Yuxarı

Şəhid Təbriz Musazadənin oğlu: “Böyüyəndə atam kimi pilot olacam”

“Atamla bağlı ən yaddaqalan hadisə mənə “Gülümsərov” deməsidir”

Bakı. 12 may. REPORT.AZ/ Bu gün qoşunların təmas xəttində erməni silahlılarının hücumunu dəf edərkən şəhid olan pilot mayor Təbriz Musazadənin qırx mərasimi keçirilib.

“Report”un xəbərinə görə, mərasimdə Azərbaycan Hərbi Hava Qüvvələrinin (HHQ) komandanı, general-mayor Ramiz Tahirov, Türkiyə hərbi attaşeliyinin nümayəndəsi, Xətai Rayon İcra Hakimiyyətinin başçısı Razim Məmmədov, ictimaiyyət nümayəndələri, şəhidin pilot yoldaşları, sadə vətəndaşlar iştirak ediblər.

Şəhidin atası Taryel Musazadə “Report”a açıqlamasında oğlu ilə fəxr etdiyini vurğulayıb: “Təbriz torpaq üçün canından keçdi. Biz onunla fəxr edirik”.

Şəhidin oğlu Onur Musazadə isə “Report”un əməkdaşı ilə söhbətində atası ilə bağlı xatirələrini bölüşüb: “Mən atamla fəxr edirəm. Atamla bağlı ən yaddaqalan hadisə mənə “Gülümsərov” deməsidir. Mən küsəyən olduğumdan atam məni elə çağırırdı...

Mən balaca olanda dənizdə çimərkən boğulurdum, atam məni xilas etdi. Onunla tez-tez futbol oynayardıq, həmişə də mən ona qalib gələrdim. Atam üçün çox darıxıram. Mən bir dəfə atamdan soruşdum ki, böyüyəndə nə olum? O, heç nə demədi. Mən də dedim ki, sənin kimi pilot olacam. O razılaşdı. Mən böyüyəndə atam kimi pilot olacam”.

Şəhidin kursant yoldaşı, Qarabağ Əlilləri və Veteranları Cəmiyyətinin üzvü İslam Əzimov T.Musazadədə vətənpərvərlik hissinin həddən artıq yüksək olduğunu vurğulayıb: “Çox yüksək keyfiyyətlərə malik idi. Millətinə, xalqına bağlı vətəndaş idi. Mən də onun yüksəldiyi zirvəyə yüksəlməyi arzu edərdim. Təbrizlə çox keşməkeşli xidmətimiz olub. O, savadlı kadr idi. Təbriz bəlkə də bundan sonra Vətənə daha çox xeyir verə bilərdi, təbii ki, Allahın qisməti belədir".

Təbriz Musazadənin digər kursant yoldaşı Mehdi Əsədullayev deyib ki, o, adına layiq ölümlə dünyasını dəyişdi: "Təbriz Vətəninə, millətinə çox bağlı idi, biz hamımız onu özümüzə örnək görürdük. Mən fəxr edirəm ki, onunla dost, qardaş olmuşam. Mən də keçmiş zabit kimi, son damla qanıma qədər vuruşmağa hazıram. Onların qanı yerdə qalmayacaq”.

Şəhidin əmisi Vaqif Musazadənin sözlərinə görə, Təbriz Musazadə öz sahəsində yüksəlmək üçün həmişə əlindən gələni edib: “Şəhidlik isə onun işinin zirvəsi idi, o bu zirvəyə də ucaldı. Fəxr edirəm ki, Təbriz torpaqlarımızın azadlığı uğrunda şəhid oldu. Allah bütün şəhidlərimizə və mənim qardaşımın balasına rəhmət eləsin. Şəhidlər unudulmur, onlar həmişə bizim qəlbimizdə yaşayacaqlar. Artıq 40 gündür ki, Təbriz aramızda yoxdur, onun yoxluğunu hamımız hiss edirik”.

Qeyd edək ki, şəhid Təbriz Musazadənin iki oğlu var.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi