​Mövlud Çavuşoğlu: "Ermənistanla münasibətlər üçün başlıca şərt Azərbaycan torpaqlarının azad olunmasıdır"

Bakı. 20 fevral. REPORT.AZ/ "Qafqazda vəziyyətin normallaşması üçün bəzi şərtlərin yerinə yetirilməsi lazımdır. Bunun üçün başlıca şərt Azərbaycan ərazilərinin işğaldan azad olunmasıdır".

"Report" Türkiyə KİV-inə istinadən xəbər verir ki, bunu Türkiyənin xarici işlər naziri Mövlud Çavuşoğlu "Sabah" qəzetinin Ankaradakı redaksiyasını ziyarəti zamanı deyib.

"İndyədək Ermənistan bu yöndə bir addım belə atmadı. Başqa sözlə, bəlli şərtlər yerinə yetirilmədikcə bizim protokolları təsdiqləməyimizdən söhbət belə gedə bilməz", - nazir vurğulayıb.

Xatırladaq ki, Türkiyə ilə Ermənistan arasında münasibətlərin normallaşmasına dair protokol 2009-cu ilin oktyabrında Sürixdə imzalanıb. Sənəd hər iki ölkənin parlamentində təsdiqləndikdən sonra qüvvəyə minəcəkdi. Bu il fevralın 16-da Ermənistan prezidenti sənədin parlamentdən geri götürülməsi haqda qərar qəbul edib.