Elmar Məmmədyarov: "Ermənistan rəhbərliyinin müharibə ritorikası münaqişənin tənzimlənməsi üzrə konstruktiv yanaşmaya niyyətli olmadığını göstərir"

Bakı. 22 sentyabr. REPORT.AZ/ Xarici işlər naziri Elmar Məmmədyarov İslam Əməkdaşlıq Təşkilatı (İƏT) üzv dövlətlərinin Xarici İşlər Nazirlərinin illik əlaqələndirmə görüşündə çıxış edib.

"Report" xəbər verir ki, o, islam həmrəyliyinin möhkəmləndirilməsi baxımından bu ilin Azərbaycan üçün uğurlu olduğunu qeyd edib.

"Azərbaycan Prezidenti İlham Əliyev tərəfindən 2017-ci il Azərbaycanda İslam Həmrəyliyi İli elan edilib. Bakıda keçirilmiş IV Ümümdünya Mədəniyyətlərarası Dialoq üzrə Forum və IV İslam Həmrəyliyi Oyunlarında İƏT Baş katibi və digər üzv dövlətlərin iştirakından məmnunluq duyduq", - deyə nazir bildirib.

E.Məmmədyarov qeyd edib ki, Azərbaycan hər zaman çoxmədəniyyətlilik və dinlərarası dialoqun təşviqi və genişləndirilməsi prosesinə töhfə verməyə çalışıb:

"Müxtəlif dinlər, xalqlar və sivilizasiyaların nümayəndələri arasında daha yaxşı anlaşmanının yaradılması məqsədi daşıyan bir çox tədbirə ev sahibliyi etmişik. Mədəni və dini rəngarəngliyə əsaslanan, ayrı-seçkiliyin mövcud olmadığı cəmiyyətin yaradılması mümkündür və Azərbaycan buna parlaq nümunədir. Azərbaycan bu ilin may ayında “Mədəniyyətlərarası Dialoqun İrəlilədilməsi-insan təhlküəsizliyi, sülh və davamlı inkişaf naminə yeni imkanlar” mövzusunda IV Ümumdünya Mədəniyyətlərarası Dialoq üzrə Forumuna uğurlu ev sahibliyindən məmnundur.

Biz həmçinin, birgə səylərimizin müsəlmanlar arasında birlik, dostluq və qardaşlıq bağlarının möhkəmləndirilməsinə yardım edəcəyinə ümid edirik".

XİN rəhbəri bildirib ki, Azərbaycan bir sıra regionlarda daha böyük təhlükəsizlik çağırışları, siyasi qeyri-sabitlik və irimiqyaslı yerdəyişmələr və misligörünməmiş humanitar böhranlara yol açan bir sıra İƏT üzv dövlətlərində müharibə və silahlı münaqişələrin mövcudluğundan ciddi narahatdır:

"İlk olaraq, vurğulamaq istərdim ki, Myanmarda Rohingya müsəlmanlarına qarşı davam edən kütləvi zorakılıq zəminində əziyyət çəkən insanlara kömək məqsədilə Azərbaycan Prezidenti İlham Əliyevin göstərişinə əsasən, Azərbaycan hökuməti tərəfindən 100 ton humanitar yardım göndərilib. Dünyanın bəzi hissələrində İslamın yanlış anlaşılması ilə bağlı vəziyyət İslamofobiyaya qarşı birgə fəaliyyətimizi möhkəmləndirməyə zərurət olduğunu təsdiq edir.

Biz Fələstin Dövlətinə münasibətdə artan beynəlxalq dəstəyi görməkdən məmnunuq. Qardaş Fələstin xalqının sülh, sabitlik və inkişaf uğrunda mübarizəsinə Azərbaycanın tam dəstəyini bir daha bəyan etmək istərdim. Azərbaycan Fələstin münaqişəsinin, Şərqi Qüdsün Fələstin Dövlətinin paytaxtı olmaqla, iki dövlət həllini davamlı olaraq dəstəkləyir.

20-21 iyul 2017-ci il tarixində Azərbaycan BMT-nin Fələstin xalqının Ayrılmaz Hüquqlarının tətbiqi üzrə Komissiyanın, Humanitar məsələlərin Əlaqələndirilməsi üzrə Ofisinin, İƏT-in və digər QHT və vətəndaş cəmiyyəti nümayəndələrinin iştirakı ilə Qüds məsələsi üzrə Beynəlxalq Konfransa ev sahibliyi edib. Konfransın yekunu olaraq təşkilatçılar adından qəbul edilmiş Kommunikedə Əl-Əqsa məscidinin bağlanması və orada ibadətə qoyulan məhdudiyyətlər qınanılıb".

Elmar Məmmdəyarov Ermənistanın Azərbaycana qarşı təcavüzünə münasibətdə göstərdiyi tam dəstəyə görə Azərbaycan hökuməti və xalqı adındanTəşkilata və onun üzv dövlərinə dərin təşəkkürünü bildirib.

"Bu təcavüz Azərbaycan torpaqlarının 20 faizinin işğalı və etnik təmizlənmə nəticəsində 1 milyon azərbaycanlının öz doğma torpaqlarından didərgin düşməsi ilə nəticələnib.

Azərbaycan Respublikası bir daha bəyan edir ki, öz ərazilərinin işğalı ilə heç vaxt barışmayacaq. Münaqişənin həlli yalnız və yalnız Azərbaycanın beynəlxalq tanınmış sərhədləri çərçivəsində suverenliyi və ərazi bütövlüyü əsasında mümkündür.

Bu xüsusda, Ermənistanın Azərbaycana qarşı təcavüzünə dair İƏT Əlaqələndirmə Qrupu toplantısının 19 sentyabr 2017-ci ildə BMT Baş Qərargahında keçirilmiş iclasının hesabatını yüksək qiymətləndiririk.

Ermənistan siyasi-hərbi rəhbərliyinin bəyanatları, müharibə ritorikası və substantiv danışıqları boykot etməsi və şərtlər irəli sürməsi münaqişənin tənzimlənməsinə konstruktiv yanaşmaya niyyətli olmadığını açıq-aşkar göstərir.

Bildiyiniz kimi, bu il Xocalı soyqırımının 25-ci ildönümü qeyd olunur. 1992-ci ilin fevralın 25-dən 26-na keçən gecə kütləvi artilleriya zərbələrinin ardınca Xocalı şəhərinə müxtəlif istiqamətlərdən hücum edilib. Nəticədə Ermənistan silahlı qüvvələri keçmiş Sovet Sosialist Respublikaları İttifaqının (SSRİ) 366 saylı moto atıcı alayının köməyi ilə Xocalının işğalını həyata keçirdilər. İşğalçılar Xocalını darmadağın etdilər və xüsusi amansızlıqla onun dinc əhalisinin qırğınını həyata keçirdilər. Nəticədə 106-ı qadın, 63-ü uşaq və 70-i yaşlı olmaqla, 613 mülki şəxs öldürüldü. 1000 nəfər yaralandı və 1275 nəfər əsir götürüldü. İndiyə qədər, Xocalının 150 sakini itkin hesab olunur. Sadəcə azərbaycanlı olduqları üçün Xocalının mülki əhalisinin məqsədli şəkildə qırğını həyata keçirilib.

Fürsətdən istifadə edərək, İƏT Baş katibi Yusif bin Əhməd əl-Useyminə və üzv dövlətlərə “Ermənistanın Azərbaycana qarşı təcavüzü”, “1992-ci il Xocalı qırğını qurbanları ilə həmrəylik” və “Ermənistanın Azərbaycana qarşı təcavüzü nəticəsində işğal olunmuş Azərbaycan ərazilərində İslam tarixinə və mədəniyyətinə aid abidələrin dağıdılması” başlıqlı qətnamələrin, eləcə də İƏT Nazirlər Şurasının 10-11 iyul 2017-ci il tarixində Abicanda keçirilmiş 44-cü iclası çərçivəsində digər sənədlərin qəbulunda ədalətli mövqeyi və dəstəyinə görə bir daha təşəkkürümü bildirirəm", - deyə XİN rəhbəri bildirib.

O həmçinin əlavə edib ki, Azərbaycan İƏT və Qoşulmama Hərəkatına üzv dövlətlər arasından EXPO-2025-ə yeganə namizəddir və Azərbaycanın namizədliyinin dəstəklənməsi xahişi ilə möhtərəm üzv dövlətlərə məktubla müraciət olunub.