Moskva. 7 sentyabr. REPORT.AZ/ Yaxın Şərqdə baş verən son hadisələri nəzərə alaraq, Rusiya və Azərbaycan arasında dostluq hər iki ölkə üçün çox vacibdir.
Bu barədə "Report"a rusiyalı politoloq, RF Federasiya Şurasının üzvü, ehtiyatda olan polis general-polkovniki Aslambek Aslaxanov bildirib.
"Ölkələr arasında münasibətlər çətin zamanlar yaşayıb. Bu gün münasibətlər, demək olar ki, ideala yaxındır. Azərbaycan Rusiya üçün dost, qonşu və tərəfdaşdır. Yaxın Şərqdə baş verən hadisələri nəzərə alaraq, bizim dostluğumuz hər iki ölkə üçün çox vacibdir", - A.Aslaxanov bildirib.
Dağlıq Qarabağ münaqişəsinin həlli məsələsinə toxunan politoloq vurğulayıb ki, "rifah açarları müharibə axtaranlarda deyil, sülh axtaranlardadır".
"Ümid edirəm ki, Qarabağ münaqişəsi tezliklə öz ədalətli həllini tapacaq. İstənilən halda, dərk etmək lazımdır ki, Rusiya olmadan Azərbaycan və Ermənistan arasında uzunmüddətli sülh olmayacaq", - politoloq bildirib.