Yuxarı
    Bağlamaq

    ​Amanda Pol: "ATƏT-in Minsk qrupu hazırkı tərkibdə çoxdan mövcuddur və müəyyən qədər köhnəlib"

    İrəvanı ATƏT-in Minsk qrupunun fəaliyyətdə olan həmsədrləri tamamilə qane edir

    Bakı. 6 fevral. REPORT.AZ/ Ermənistan ATƏT-in Minsk qrupunun həmsədrləri tərkibinin dəyişdirilməsi ilə bağlı təşəbbüsü dəstəkləməyəcək, çünki İrəvanı hazırkı həmsədrlər tamamilə qane edir. Bu barədə "Report"a Avropa Siyasəti Mərkəzinin eksperti, publisist Amanda Pol bildirib. 

    Xatırladaq ki, bir müddət əvvəl Azərbaycan Milli Məclisinin deputatı Azay Quliyev ATƏT-in Minsk qrupunun tərkibinə yenidən baxılması və həmsədr ölkələr qismində bu prosesəTürkiyə və Almaniyanın daxil edilməsi ehtimalı haqqında bəyan edib. 

    "Ermənistanın bu təşəbbüsü dəstəkləməsi ehtimalı azdır, çünki İrəvanı hazırkı həmsədrlər tamamilə qane edir", - A.Pol qeyd edib. 

    "Minsk qrupu hazırkı tərkibdə çoxdan mövcuddur və müəyyən qədər köhnəlib", - ekspert vurğulayıb. 

    Onun sözlərinə görə, qrupun tərkibinə yeni nəfəsin gətirilməsi pis fikir deyil. Ekspert xatırladıb ki, MQ həmsədrlərinin tərkibinin dəyişdirilməsi məsələsi Azərbaycan prezidenti İlham Əliyevin Almaniyaya səfəri və kansler Anqela Merkel ilə görüşündən sonra qaldırılıb. Həmin görüşdə kansler açıq şəkildə bildirib ki, "Almaniya həmin problemin həllində kömək edə bilər". 

    "Bundan başqa, Almaniyanın xarici siyasətinin son icmalı zamanı bu ölkəyə münaqişələrin həllində daha aktiv iştirak etmək tövsiyə olunub. Almaniya bu gün Avropa İttifaqının ən güclü üzv dövlətidir, bu səbəbdən Berlin buna hazır olarsa, düşünürəm ki, müsbət nəticə əldə oluna bilər", - A.Pol söyləyib. 

    Ekspert bildirib ki, Aİ Şərq Tərəfdaşlığı proqramına daxil olan ölkələrdə münaqişələrin həllində daha fəal rol oynamalıdır, çünki münaqişələr regional sabitlik və təhlükəsizliyin təmin olunması yolunda özünəməxsus əngəl ola bilər. 

    Türkiyənin ATƏT-in Minsk qrupu həmsədri kimi bu qurumun tərkibinə daxil edilməsi ehtimalı haqqında məsələyə toxunan ekspert xatırladıb ki, Azərbaycan Ankaranı artıq ATƏT-in MQ həmsədri qismində təklif edib, lakin Türkiyənin münaqişəyə aid münasibətini nəzərə alaraq, onun mövqeyinin qərəzsiz olmadığı qənaətinə gəlmək olar, bu da onun MQ həmsədri olmağını çətinləşdirir".

    "İrəvan Türkiyənin mövqeyini qərəzli hesab edir, buna görə də, Türkiyənin danışıqlar masasında yer almaq şansı çox azdır", - A.Pol bildirib.

    O, həmçinin qeyd edib ki, qrupun tərkibini dəyişdirmək üçün qalan 2 həmsədrin razılığı tələb olunur, bu da öz növbəsində çox çətin məsələdir. 

    "Hadisələrin inkişafının 2 ssenarisi mövcuddur: ya hazırkı tərkibin digər ölkələrin daxil edilməsi ilə genişləndirilməsi, ya da üç həmsədrin danışıqlar masasını tərk etməsidir. Ehtimal etmək olar ki, bu Fransa və ABŞ olacaq, çünki Rusiyanın bu prosesdən kənarlaşdırılması üçün heç bir şans yoxdur, baxmayaraq ki, Rusiya özünü münaqişələri həll edən deyil, onları yaradan ölkə kimi göstərib", - publisist qeyd edib və bildirib ki, Fransa getməsinə etiraz etməyəcək. 

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi