ATƏT-in fəaliyyətdə olan sədri: "Uzunmüddətli münaqişələrin həlli üçün səyləri gücləndirmək lazımdır"

Bakı. 15 yanvar. REPORT.AZ/ ATƏT məkanında uzunmüddətli münaqişələrin həlli Serbiyanın təşkilatda sədrliyinin gündəliyində duran əsas məsələlərdən biri olacaq. "Report" xəbər verir ki, bu barədə ATƏT-in fəaliyətdə olan sədri, Serbiya baş nazirinin birinci müavini, xarici işlər naziri İvitsa Daçiç Vyanada ATƏT-in Daimi Şurasının iclasında çıxışı zamanı bildirib. 

O qeyd edib ki, Serbiya ATƏT-də sədrliyi çərçivəsində 2015-ci ildə Ukraynada davamlı atəşkəsin əldə edilməsinə və münaqişənin həllinə, eləcə də ATƏT məkanında bütün uzunmüddətli münaqişələrin həllinə köməklik etmək niyyətindədir. 

"Güman edirəm ki, ATƏT məkanında uzunmüddətli münaqişələrdə mövcud status-kvodan irəliləmək imkanı var və biz bu istiqamətdə səylərimizi gücləndirməliyik", - İ.Daçiç bildirib. 

O, münaqişə tərəfləri arasında əlaqələrin saxlanılması və görüşlərin keçirilməsinin davam etdirilməsinin zəruri olduğunu vurğulayıb. 

"Bəzi konkret addımlar tərəflər arasında etimadı artıra bilər", - ATƏT-in fəaliyyətdə olan sədri deyib. 

Serbiya XİN rəhbərinin sözlərinə görə, bu gün münaqişələrin həllinin açarı tərəflərin öz əlindədir.

O qeyd edib ki, ATƏT bu münaqişələrin həlli üçün siyasi iradənin yaranması məqsədilə səyləri dəstəkləməyi vəd edib.

İ.Daçiç münaqişələrin təkrarlanmasına və mövcud münaqişələrin gərginləşməsinə yol verməməyin zərurətini vurğulayıb.