Nazir: İtki və Zərərə Cavab Fondu ölkələrə kömək üçün əsas vasitə olacaq

İtki və Zərərə Cavab Fondu iqlim dəyişikliyinin nəticələrini aradan qaldırmaqda ölkələrə kömək etmək üçün əsas vasitə olacaq.

"Report" xəbər verir ki, bunu BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) müəyyən olunmuş prezidenti, ekologiya və təbii sərvətlər naziri Muxtar Babayev İtki və Zərərə Cavab Fondunun İdarə Heyətinin üçüncü iclasında çıxışı zamanı deyib.

O qeyd edib ki, COP29-da Paris Sazişinin bütün istiqamətləri üzrə irəliləyiş əldə etməyə çalışılacaq:

“Bu prosesdə isə iqlim maliyyəsi əsas yer tutacaq. Bunu edərkən biz əvvəlki COP-ların uğurlarına əsaslanacağıq və BƏƏ Konsensusunun nəticələrinin həyata keçirilməsinə kömək edəcəyik".

M.Babayev vurğulayıb ki, bu hadisələrin həm də ciddi iqtisadi xərcləri var:

"Bu ayın əvvəlində Ümumdünya Meteorologiya Təşkilatı qeyd edib ki, Afrika ölkələri iqlim dəyişikliyi səbəbindən ÜDM-lərinin 5 %-ə qədərini itirirlər. İnkişaf etməkdə olan kiçik ada dövlətləri isə təbii fəlakətlərdən orta hesabla ÜDM-lərinin 2,1 %-ni itirirlər. Bu insanlar üçün iqlim böhranı ekzistensialdır. Bizim bu ölkələrə dəstək olmaq mənəvi borcumuzdur, çünki onlar iqlim dəyişikliyinin ön cəbhəsində dayanaraq həm insan, həm də iqtisadi itkilərlə üzləşirlər".