Yuxarı
    Bağlamaq

    “Gənclərin biznes quruculuğuna dəstək” pilot layihəsi başa çatıb

    Layihə Bakı, Gəncə və Mingəçevir şəhərlərində reallaşdırılıb

    Bakı. 16 fevral. REPORT.AZ/ Gənclər üçün Təhsil Mərkəzi Azərbaycan Respublikasının Prezidenti yanında Gənclər Fondunun maliyyə dəstəyi ilə həyata keçirdiyi “Gənclərin biznes quruculuğuna dəstək” adlı pilot layihəni uğurla başa çatdırıb.

    Mərkəzin mətbuat xidmətindən "Report"a verilən məlumata görə, Bakı, Gəncə və Mingəçevir şəhərlərində reallaşdırılan layihənin əsas məqsədi gənclərin kiçik biznes quruculuğuna təşviq edilməsinə, onların sahibkarlıq subyektinə çevrilməsi üçün münbit şəraitin yaradılmasına, gənclərin bu sahədə bilik və bacarıqlarının artırılmasına kömək etmək idi.

    Layihənin ilk mərhələsində təcrübəli ekspertlər və sahibkarlar tərəfindən gənclər üçün təlim proqramı təşkil olunub, biznes quruculuğu, etikası, investorlara 5 dəqiqə ərzində ideyanı təqdim etmək, müştəri məmnuniyyəti, ideyanı biznesə çevirmək, strateji planlaşdırma, maliyyə axtarışı, risklərin idarə olunması və s. mövzularda tədris prosesi aparılıb.

    Layihənin digər mərhələlərində isə gənclər üçün aparıcı şirkətlərdə praktiki məşğələlər təşkili edilib, tanınan iş adamları ilə görüşlər keçirilib, sahibkarlıq subyekti olmaq istəyən gənclərə hüquqi yardımlar göstərilib, onlar üçün məsləhət xidmətləri təşkil olunub.

    Mərkəzin icraçı direktoru Fəxrəddin Həsənzadə bildirib ki, başa çatan pilot layihə qurumun kiçik biznes quruculuğu sahəsində gənclər üçün hazırladığı uzunmüddətli proqramın başlanğıcı idi: "Bu layihə ölkənin aparıcı şəhərlərində gənclərin sahibkar kimi formalaşmasına marağın hansı səviyyədə olmasını, hansı resursların yaradılmasına olan ehtiyacı və s. öyrənməyə imkan verdi. Hazırda bu layihənin benefisiantı olmuş 6 gənc kiçik biznes qurur. Ümid edirik ki, uzunmüddətli proqramımız çərçivəsində kiçik biznes quran gənclərimizin sayı daha da artacaq. Düşünürük ki, bu layihənin əhatə dairəsini və icra mexanizmlərini daha da təkmilləşdirək".

    Qeyd edək ki, yaxın gələcəkdə Mərkəzin nəzdində Gənclərin Biznes Quruculuğuna Dəstək Xidməti adlı qurumun yaradılması planlaşdırılır. 

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi