Türkiyəli nazir: “SOCAR-ın Türkiyədəki sərmayələri bizim üçün son dərəcədə önəmlidir”

Azərbaycan və Türkiyə arasında Birgə İqtisadi Komissiyanın toplantısında 147 maddədən ibarət ortaq fəaliyyət planı hazırlanıb. Mən İqtisadiyyat naziri Mikayıl Cabbarov ilə birlikdə bu 147 maddədə qarşıya qoyulan vəzifələrin həyata keçirilməsini daim nəzarətdə saxlayacağıq.

“Report”un məlumatına görə, bunu bu gün Azərbaycan Prezidenti İlham Əliyev ilə görüşü zamanı Türkiyənin Ticarət naziri xanım Ruhsar Pekcan bildirib.

Onun sözlərinə görə, Azərbaycanın Gömrük Komitəsinin sədri ilə Ankara görüşündə Sadələşdirilmiş Gömrük Dəhlizi ilə bağlı anlaşma memorandumu imzalanıb: “Azərbaycan, Gürcüstan, Türkiyə olaraq Sizlərin də dəstəyi ilə, inşallah, həm ortaq biznes forum keçirəcək, həm də ortaq Sadələşdirilmiş Gömrük Dəhlizi haqqında anlaşma memorandumu imzalayaraq ölkələrimiz arasında ticarətin, gömrük-keçid prosedurlarının asanlaşdırılması ilə bağlı birgə addımlar atacağıq. Həmçinin cənab prezidentlərimizin dəstəyi ilə yaxın zamanlarda bizə güzəştli ticarət müqaviləsi imzalamaq qismət olacaq”.

O bildirib ki, bu müqavilə 15 maddəlik məhdud bir müqavilədir: “Genişləndirib sənədə yeni nəsil azad ticarət razılaşmalarını, xidmətləri, sərmayələri də daxil etmək istəyirik. Azərbaycanın, SOCAR-ın Türkiyədəki sərmayələri bizim üçün son dərəcədə önəmlidir. Biz də bütün dəstəyimiz, təşviqimizlə SOCAR-ın yanındayıq. İnşallah, yeni sərmayələr də gözləyirik. Azərbaycanın investisiya imkanlarının tanıdılması ilə bağlı sentyabrda təqdimat təşkil etməyi nəzərdə tuturduq. Amma, cənab Prezident, indi həmkarlarımızla müzakirələr aparıb fevral ayında Türkiyədə Azərbaycanın investisiya iqlimi ilə bağlı təqdimat təşkil etməyi planlaşdırırıq”.