İranla Azərbaycan arasında ticarət dövriyyəsi bu il 70% artıb

Bakı. 7 sentyabr. REPORT.AZ/ Bu ilin ilk yarısında İranla Azərbaycan arasında idxal-ixrac əməliyyatlarının həcmi 70% artıb. "Report" xəbər verir ki, bunu jurnalistlərə açıqlamasında İran səfirliyinin ticarət attaşesi Məhəmməd İbrahim Nağızadə deyib.

"Ötən il ərzində İrandan Azərbaycana 272 mln. dollarlıq mal ixrac edilib. Bu il Azərbaycanın İrana ixracının isə iki dəfə artaraq 30 mln. dollara çatacağı gözlənilir", - deyə İran rəsmisi qeyd edib.

M.İ.Nağızadənin sözlərinə görə, ilin sonuna qədər bu rəqəmin daha da artacağı gözlənilir: "Bakıda İran şirkətlərinin sərgisi keçiriləcək. Sərgi sahəsi 2 000 kv. metrlik ərazini əhatə edəcək və 50-dən çox şirkət burada öz potensialını nümayiş etdirəcək". 

"Həmçinin, İran-Azərbaycan biznes-forumu keçiriləcək. Forumda 150-dən artıq iş adamının iştirak etməsi gözlənilir. Bu məqsədlə "Azpromo" ilə əməkdaşlıq edirik. Azərbaycan tərəfindən biznes-forumda 300 şirkət iştirak etməyə razılıq verib", - deyə ticarət attaşesi bildirib.