Yuxarı
    Bağlamaq

    Gömrük Bəyannaməsi Rəqəmsal Ticarət Qovşağı vasitəsilə doldurulacaq

    Bunun üçün ixracatçı ASAN imza və yaxud E-imzadan istifadə edə bilər

    Bakı. 1 avqust. REPORT.AZ/ “Azərbaycan Rəqəmsal Ticarət Qovşağı”nda daha öncə test olaraq fəaliyyət göstərən elektron gömrük bəyannamələrinin doldurulması real vaxt rejimində həyata keçirilməyə başlayıb. 

    Bu barədə “Report”a İqtisadi İslahatların Təhlili və Kommunikasiya Mərkəzinin (İİTKM) mətbuat xidmətindən məlumat verilib.

    Bildirilib ki, bunun üçün ixracatçı "ASAN imza" və yaxud "E-imza" ilə Rəqəmsal Ticarət Qovşağının saytına (https://dth.azexport.az/) daxil olaraq elektron gömrük bəyannaməsini doldura bilər.

    “Rəqəmsal Ticarət Qovşağının üstünlüyü ondan ibarətdir ki, bütün xidmətlər “Bir pəncərə”dən təqdim olunur. “Azexport” portalının nəzdində olan “Bir pəncərə” Azərbaycan sahibkarları ilə onların xarici biznes tərəfdaşları arasında sənədlərin, o cümlədən müqavilələrin elektron formada tərtibinə və imzalanmasına, habelə real vaxt rejimində transsərhəd elektron xidmətlərin həyata keçirilməsinə imkan verir. Beləliklə, daha az resurs sərf etməklə ixrac prosedurlarını daha sürətlə həyata keçirən sahibkarlar bir pəncərə əsasında e-İxracın imkanlarından yararlanacaqlar”, - İİTKM-nin məlumatında deyilir.

    Hazırda “e-İxrac"a inteqrasiya olunan dövlət orqanları real vaxt rejimində məlumat mübadiləsini təşkil edir. “e-İxrac” beynəlxalq baytarlıq sertifikatı, fitosanitar sertifikat, keyfiyyət sertifikatı, mənşə sertifikatı, kökünün kəsilməsi təhlükəsi olan vəhşi fauna və yabanı flora növlərinin ixracı üçün icazə, mədəni sərvətlərin ixracı üçün mədəni sərvətin mühafizə şəhadətnaməsi və dini təyinatlı ədəbiyyatın (kağız və elektron daşıyıcılarda), audio və videomaterialların, malların (məmulatların) və dini məzmunlu başqa məlumat materiallarının ixracına razılıq verilməsi sertifikatların verilməsini təmin edir.

    Qurumun açıqlamasında deyilir ki, ixrac təşviqinin ödənilməsi üçün müraciətlərin göndərilməsi də portal vasitəsilə həyata keçirildiyi üçün gələcəkdə bu hesablaşmaların aparılması asanlaşacaq.

    Qeyd edək ki, Prezident İlham Əliyevin 2017-ci il 22 fevral tarixli fərmanı əsasında yaradılan Azərbaycan Rəqəmsal Ticarət Qovşağının operatoru İİTKM-dir.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi