Fransa Azərbaycanda sərmayələrinin şaxələndirilməsində maraqlıdır

Bakı. 4 noyabr. REPORT.AZ/ Fransa 2015-ci ildə Azərbaycana 180 milyon avro məbləğində mal ixrac edib. Azərbaycandan idxal isə əsasən enerji sənayesinin məhsulları olub və 1,2 milyard avro təşkil edib.

"Report" xəbər verir ki, bu barədə Fransanın biznes imkanlarının təqdimat mərasiminə həsr olunmuş mətbuat konfransında Fransanın Azərbaycandakı səfirliyinin iqtisadi məsələlər üzrə müşaviri Erve Sarinelli bildirib.

Öz növbəsində, Fransanın Azərbaycandakı səfiri Oreliya Buşe hazırda Azərbaycanda təxminən 40 Fransa şirkətinin fəaliyyət göstərdiyini qeyd edib. Onun sözlərinə görə, bu şirkətlər əsasən energetika, ətraf mühitin mühafizəsi, nəqliyyat sahələri ilə məşğul olurlar: "Fransa şirkətlərinin Azərbaycanda yalnız energetika yox, digər sahələrdə də fəaliyyət göstərməsinə çalışırıq. Məncə, bu, iqtisadiyyatının şaxələndirilməsi baxımından Azərbaycanın da maraqlarına cavab verir".