ƏMDK: Ötən il 300-dən çox dövlət əmlakı özəlləşdirilib

Bakı. 24 yanvar. REPORT.AZ/ Əmlak Məsələləri Dövlət Komitəsində (ƏMDK) 2016-cı ildə görülmüş işlərə və qarşıda duran vəzifələrə dair geniş müşavirə keçirilib. 

Bu barədə “Report”a komitədən bildirilib.

Məlumata görə, müşavirədə çıxış edən ƏMDK sədri Kərəm Həsənov bildirib ki, Prezident İlham Əliyevin 19 iyul 2016-cı il tarixli fərmanı və Nazirlər Kabinetinin müvafiq sərəncamı ilə ötən il 300-dən çox yeni dövlət müəssisəsi və obyekti özəlləşdirilməyə açıq elan olunub. Onların siyahısı komitənin elektron informasiya resurslarında geniş ictimaiyyətə və potensial yerli və xarici investorlara açıqlanıb.

Onun sözlərinə görə, dövlət əmlakının özəlləşdirilməsinə yerli və xarici investorları geniş şəkildə cəlb etmək, məqsədilə özəlləşmə ilə bağlı qabaqcıl ölkələrin təcrübələri öyrənilib. Dünya reytinqində ilk 10-luğa daxil olan şirkətlərin və Beynəlxalq Valyuta Fondunun nümayəndələri ilə görüşlər keçirilib. Bir sıra beynəlxalq məsləhətçi şirkətləri ilə müvafiq anlaşma memorandumu və çərçivə sazişləri imzalanıb. Dünyanın 50-dən artıq nüfuzlu strateji investoruna, investisiya fond və banklarına özəlləşdirmə prosesi və bu sahədə potensial əməkdaşlıq imkanları haqqında müraciətlər göndərilib. Amerika Ticarət Palatası (AmCham) ilə əməkdaşlıq çərçivəsində keçirilən tədbirdə investorlara ölkədə həyata keçirilən iqtisadi islahatlar, özəlləşdirmə prosesindəki yeniliklər, habelə ölkənin investisiya imkanları və gələcək perspektivlər barədə məlumatlar verilib.

K.Həsənov həmçinin qeyd edib ki, dövlət müəssisələri və səhmdar cəmiyyətlərdən 5 315 illik xüsusi hesabat forması alınıb ki, bunun 91%-i elektron qaydada qəbul olunub.

Bundan başqa, ötən il Komitənin təşkilatçılığı ilə Azərbaycanın Beynəlxalq Daşınmaz Əmlak və İnvestisiya Sərgisi keçirilib. Dünyanın 10 ölkəsindən olan 50-dən çox daşınmaz əmlak şirkətləri, investisiya qurumları və digər təşkilatlar bu dərgidə çıxış edib.

Özəlləşdirmə prosesində şəffaflığın, optimallığın və müasirliyin təmin olunması məqsədilə “Özəlləşdirmə portalı” istifadəyə verilib. Portaldan istifadə edənlərin sayı artıq 400 mini ötüb.

Komitə sədri çıxışında bildirib ki, ötən dövrdə torpaq münasibətlərində yeni çağırışların gündəmə gəlməsi torpaq idarəçiliyinin təkmilləşdirilməsi, uçotun düzgün aparılması, torpaqlardan qeyri-qanuni istifadə hallarının qarşısının alınması kimi məsələləri daha da aktuallaşdırıb. Müvafiq Sərəncamla 13 iyul 2016-cı il tarixdə təsdiq olunmuş daşınmaz əmlakın kadastrı və torpaq idarəçilinin inkişafına dair 2016-2020-ci illər üçün Dövlət Proqramına əsasən işlər görülməkdədir. Proqrama əsasən 2020-ci ilə kimi daşınmaz əmlakın vahid dövlət kadastrının formalaşdırılması, torpaqlardan istifadə və mühafizəsinin səmərəliliyinin artırılması, torpaqla bağlı vahid məlumat bazasının yaradılması işi tamamlanacaq.

O, həmçinin deyib ki, respublikanın 12 rayonunda elektron kadastr uçotu işləri yekunlaşıb. Nəticədə reallığı əks etdirən rəqəmsal kadastr xəritələri tərtib olunub. Gəncə, Sumqayıt şəhər bələdiyyələrinin, Bakı şəhərinin 3 bələdiyyəsi (Nəsimi, Yasamal və Bakıxanov) üzrə xəritələr hazırlanıb. Ötən il Gəncə və Şəki şəhərləri üzrə böyük kadastr layihələri yekunlaşıb və təqdimatı keçirilib.

Xəzər dənizinin Azərbaycana mənsub olan sahilboyu su səthinin quru ilə təmas xəttinin qrafiki təsviri hazırlanıb və Nazirlər Kabineti tərəfindən təsdiq edilib.

2016-cı ildə ölkənin 4,1 mln. ha ərazisinin ortofotomateriallarının rəqəmsallaşdırılması işi və 4,1 mln. ha ərazi üçün relyef xəritələrinin hazırlanması işi artıq yekunlaşıb. Bu materiallara istinadən ölkənin 51 kənd rayonunun müxtəlif qradasiyalı meyllik xəritələri tərtib edilmiş və onların 3D formatda relyef xəritələri hazırlanıb.

Komitə tərəfindən torpaqların səmərəli istifadə olunması və mühafizəsinə nəzarət məqsədilə Bakı və regionlarda monitorinqlər və reydlərin keçirilməsi işləri davam etdirilib. Monitorinqlər zamanı pozuntu hallarının aşkarlanması və qarşısının alınması, qanunvericiliyə əsasən cəza və inzibati tədbirlərin görülməsi təmin edilib.

Müşavirədə qeyd olunub ki, Prezidentin 18 noyabr 2016-cı il tarixli fərmanına əsasən, fərdi evlərin sənədləşdirilməsi işi daha da sadələşib, qeydiyyat xidmətlərində rahatlıq və vətəndaş məmnunluğunun yüksəlməsi təmin edilib. Azərbaycan ilk dəfə olaraq bu il əmlak hüquqlarının qorunması indeksinə görə “Mülkiyyət hüquqları Alyansı”nın 129 ölkəni əhatə edən reytinq cədvəli üzrə 20-ci yerdə qərarlaşıb. Dünya Bankı tərəfindən ötən il dərc olunan “Doing Business” hesabatında Azərbaycan növbəti dəfə də daşınmaz əmlakın qeydiyyatının sadəliyinə görə dünya ölkələri arasında ön sıralarda yer alıb.

2016-cı il ərzində ölkə üzrə 172 minə yaxın daşınmaz əmlak obyekti üzərində mülkiyyət hüquqları qeydiyyata alınıb. Bu göstəricinin 50 minə yaxını ilkin, 122 min isə təkrar qeydiyyata aid olub. 2015-ci ildəki göstəricilərlə müqayisədə ötən il ilkin qeydiyyata dair verilmiş çıxarışların sayında 18,7%, tərtib olunmuş texniki pasportların sayında 4,5% artım qeydə alınıb.

Müşavirənin sonunda Komitə sədri qarşıdakı fəaliyyətlə bağlı tapşırıqlarını səsləndirib. Azərbaycan Prezidentinin 6 dekabr 2016-cı il tarixli fərmanı ilə təsdiq edilmiş Strateji Yol Xəritələrində nəzərdə tutulan tədbirlərin icrası üçün zəruri işlərin görülməsi barədə tapşırıqlar verilib. Özəlləşməyə yeni açılmış müəssisələrin inventarizasiya işləri qısa zamanda başa çatdırılmalı, dövlət müəssisələrində korporativ idarəetmə qaydalarının tətbiqi tam təmin edilməlidir. Regionlarda rəqabət potensialı olan və sosial-iqtisadi inkişafa töhfə verə biləcək müəssisələrin özəlləşdirilməsi üçün investorların cəlb edilməsi üçün işlər sürətləndirilməlidir. Dövlət mülkiyyətində saxlanılacaq müəssisələrin səmərəli fəaliyyətinin qiymətləndirilməsi qaydasının hazırlanması ilə bağlı beynəlxalq təcrübə araşdırılmalıdır. Müxtəlif profilli xarici investorların özəlləşdirmə prosesinə cəlb edilməsi üçün geniş təbliğat işləri aparılmalıdır. Daşınmaz əmlakın qeydiyyatı və kadastrı sahəsində işlər daha keyfiyyətli və operativ şəkildə həyata keçirilməlidir. Komitənin vətəndaşlara göstərdiyi xidmətlər üzrə məmnunluq səviyyəsi maksimum təmin olunmalıdır.