Yuxarı

"Baku Electronics"in iki mağazası bağlanıb

Azərbaycanın məişət texnikası bazarında vəziyyət getdikcə ağırlaşır

Bakı. 8 yanvar. REPORT.AZ/ Azərbaycanda milli valyutanın məzənnəsinin sürətlə dəyərdən düşməsi məişət texnikasının satışı bazarında fəaliyyət göstərən yerli iri şirkətlərin fəaliyyətində problem yaradıb. Müşahidə olunan qlobal böhran artıq "Baku Electronics" şirkətinə ciddi təsir edib.

"Report" xəbər verir ki, ötən il ərzində baş verən milli valyutanın təxminən 100%-lik devalvasiyası fonunda şirkətdə aparılan ixtisarlar və bəzi filialların bağlanması prosesi 2016-cı ildə də davam edir. Şirkət xərclərin optimallaşdırılması planı çərçivəsində paytaxtdakı iki filialını bu günlərdə bağlayıb. Həmin obyektlərin işçiləri isə ödənilməyən məzuniyyətə göndərilib. Dünəndən etibarən artıq işçilərə rəsmi şəkildə işdən çıxarıldıqları barədə məlumat verilib. 

Qeyd edək ki, bağlanan mağazalar "Baku Electronics"in Mərdəkan qəsəbəsi və "Metropark" Ticarət Mərkəzində yerləşən satış mərkəzləridir. Onların bağlanma səbəbi "Baku Electronics"in ticarət dövriyyəsinin xeyli zəifləməsi ilə əlaqələndirilir. Məsələn, böhrandan öncə 1 gündə 10 min manat həcmində satış həyata keçirilirdisə, hazırda bu rəqəm təqribən 3-4 min manata düşüb (dollar ekvivalentində isə azalma 6 dəfədən çox olub).

Hər iki mağazada ümumilikdə 15 işçi olub. İşsiz qalanların sözlərinə görə, işçilərin daha 30%-nin ixtisar ediləcəyi nəzərdə tutulub.

Manatın ikinci devalvasiyasından məişət texnikasını yeni qiymətlərlə satmalı olan şəbəkə, artıq hər hansı endirim kampaniyası keçirməyi nəzərdə tutmur. Bundan əlavə, işçilərə ödənilən mükafat və bonuslar ləğv edilib.

Qeyd edək ki, "Baku Electronics" 1994-cü ildə Bakıda bir mağaza ilə fəaliyyətə başlayıb. Hazırda şirkətin Bakı, Sumqayıt, Gəncə, Şəmkir, Quba, İsmayıllı, Mingəçevir, Yevlax, Zaqatala və Göyçayda yerləşən 18 mağazası ilə yanaşı Şirvan, Xaçmaz, Lənkəran, Cəlilabad, Şəki, Qusar, Biləsuvar, Masallı, Şirvan, Sabirabad, İmişli, Ağcabədi, Şamaxı, İsmayıllı, Qəbələ, Oğuz, Qax, Mingəçevir, Goranboy, Tovuz, Balakən, Zaqatala rayonlarında rəsmi nümayəndəlikləri də mövcuddur.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi