Yuxarı

​Azərbaycanla Özbəkistan arasında iqtisadi sahədə əməkdaşlıq müzakirə edilib

Nümayəndə heyəti Özbəkistanın bir sıra istehsal müəssisələrində olub

Bakı. 27 fevral. REPORT.AZ/ İqtisadiyyat və sənaye naziri Şahin Mustafayevin rəhbərlik etdiyi nümayəndə heyəti Özbəkistanda səfərdə olub.

“Report” nazirliyə istinadən xəbər verir ki, səfər zamanı Azərbaycan nümayəndə heyəti Özbəkistanın baş nazirinin müavini Uluqbek Roziqulovla görüşüb.

Görüşdə iki ölkəni möhkəm tarixi, mədəni əlaqələrin bağladığı, bugünkü münasibətlərin də məhz bu baza əsasında formalaşdığı və inkişaf etdiyi qeyd olunub. Nümayəndə heyətinin başçısı, iqtisadiyyat və sənaye naziri Şahin Mustafayev Azərbaycanla Özbəkistan arasında əməkdaşlığın qarşılıqlı hörmət, dostluq, faydalı əməkdaşlıq prinsipləri üzərində qurulduğunu diqqətə çatdırıb, dövlət başçılarının qarşılıqlı rəsmi səfərlərinin, aparılan danışıqların ikitərəfli əlaqələrin genişlənməsində əhəmiyyətini vurğulayıb.

Görüşdə iki ölkə arasında bir sıra iqtisadi sahələrdə, eləcə də nəqliyyat, tranzit daşımaları kimi sahələrdə əməkdaşlığın daha da genişləndirilməsi, Özbəkistan yüklərinin Azərbaycandan keçməklə dünya bazarına çıxarılması, ticarət əlaqələrinin genişləndirilməsi, Özbəkistanda istehsal edilən müxtəlif avtomobillərin Azərbaycana ixracı məsələləri barədə müzakirələr aparılıb.

Səfər zamanı nazir Şahin Mustafayevin rəhbərlik etdiyi Azərbaycan nümayəndə heyəti Özbəkistanın xarici iqtisadi əlaqələr, investisiyalar və ticarət naziri Elyor Qəniyev və iqtisadiyyat naziri Qalina Saidova ilə görüşüb.

Görüşlərdə ölkələr arasında iqtisadi, ticarət əlaqələrinin və investisiya əməkdaşlığının daha da genişləndirilməsi məsələlərinə dair fikir mübadiləsi aparılıb, Özbəkistanda istehsal edilən kənd təsərrüfatı texnikasının və müxtəlif məhsulların ölkəyə ixracı, Azərbaycanın qeyri-neft məhsullarının Özbəkistana ixracı kimi məsələlər də müzakirə edilib. Görüşlərdə əməkdaşlığın genişləndirilməsi üçün böyük potensialın olduğu vurğulanıb, işgüzar səfərlərin, birgə biznes forumların və sərgilərin iş adamları arasında əlaqələrin genişləndirilməsində əhəmiyyəti diqqət çatdırılıb.

Səfər çərçivəsində Azərbaycan nümayəndə heyəti Özbəkistanın bir sıra istehsal müəssisələrində olub.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi