Bakı. 24 iyul. REPORT.AZ/ Avropa Komissiyası elektronika istehsalçısı olan 4 şirkəti - "Asus", "Denon & Marantz", "Philips" və "Pioneer" şirkətlərini Avropa İttifaqının antiinhisarçılıq qanunvericiliyinə zidd olaraq tərəfdaş internet mağazalarında minimum pərakəndə qiymətlər təyin etdiklərinə görə cərimələyib.
"Report" "İnterfaks"a istinadən xəbər verir ki, Avropa Komissiyasının press-relizində cərimənin ümumi məbləğinin 111 milyon avrodan çox olduğu vurğulanıb.
"Bu dörd şirkətin atdığı addımlar nəticəsində milyonlarla avropalı istehlakçı mətbəx texnikası, fenlər, noutbuklar, qulaqcıqlar və digər məhsullar üçün daha yüksək qiymətlər ödəyiblər", - Avropa Komissiyasının rəqabət məsələləri üzrə üzvü Marqrete Vestager bildirib.