Almaniya şirkətləri ABŞ-ın Rusiyaya qarşı sanksiyalarına görə 1 milyard avrodan çox zərərə düşüb

Rusiyada fəaliyyət göstərən Almaniya şirkətləri ABŞ-ın bu ölkəyə qarşı tətbiq etdiyi sanksiyalara görə 1,1 milyard avro zərərə düşüb. 

“Report” xəbər verir ki, bu barədə Rus-Alman Ticarət Palatası məlumat yayıb.

Palata 141 şirkət arasında sorğu keçirib. Onların 41%-i isə sanksiyaların fəaliyyətlərinə hər hansı təsir göstərmədiyini bildirib. Şirkətlərin 28%-i isə sanksiyalara görə 1 milyon avro, 22%-i 10 milyon avro, 5%-i 50 milyon avro, 2%-i 100 milyon avro, 1%-i isə 500 milyon avro civarında zərər etdiyini bəyan edib. 

Rəyi soruşulan iş adamlarından 63%-i Rusiyada biznes fəaliyyətini məhdudlaşdırmaq niyyətində olmadığını deyib. Bu rəqəm ötən il 53% təşkil edib. Respondentlərin 8%-i Rusiyadakı işlərini azaldacağını, 29%-i isə əksinə, artıracağını qeyd edib. 

Yaxın 1 il ərzində Rusiya iqtisadiyyatına 44 Almaniya şirkətinin, ümumilikdə, 395 milyon avro sərmayə qoyacağı da bu sorğu nəticəsində məlum olub.