“ABŞ 27 ildir Azərbaycanın müstəqilliyini və iqtisadi inkişafını dəstəkləyir. Bu illər ərzində ABŞ-ın Azərbaycana maliyyə dəstəyi 1,3 mlrd. dollar təşkil edib. Ümid edirəm ki, logistika, nəqliyyat və energetika sahələrində konkret nəticələr əldə edəcəyik”.
“Report”un məlumatına görə, bunu Azərbaycan-ABŞ İqtisadi Əməkdaşlıq Komissiyasının 4-cü iclasında ABŞ-ın Azərbaycandakı səfiri Örl Litzenberger deyib.
Onun sözlərinə görə, Azərbaycan son illər böyük iqtisadi irəliləyişlərə nail olub: “ABŞ Azərbaycanın hüquq və məhkəmə sistemində ishalatların həyata keçirəcəyinə ümid edir. Çox istərdik ki, əqli mülkiyyət huquqlarının qorunmasında irəliləyişlər olsun”.
Səfir həmçinin Bakı-Tbilisi-Qars dəmir yolu layihəsinin reallaşdırılmasını ölkənin uğurlarından biri kimi qeyd edib.
“Neft-qaz layihələri də uğurla həyata keçirilir. ABŞ Azərbaycanın energetika layihələrini, xüsusilə də Cənub Qaz Dəhlizi layihəsini dəstəkləməkdə davam edir. Bu komissiya çərçivəsində əməkdaşlığımızın genişlənəcəyinə və uğurlu olacağına ümid edirəm”, - Örl Litzenberger bildirib.