Yanvarda avtomobil idxalı 20 %-dən çox azalıb

2021-ci ilin yanvarında Azərbaycana 53 mln 444,59 min ABŞ dolları dəyərində 4 642 ədəd müxtəlif təyinatlı avtomobil idxal olunub.

“Report” Dövlət Gömrük Komitəsinə istinadən xəbər verir ki, bu, 2020-ci ilin eyni dövrü ilə müqayisədə 1 264 ədəd və yaxud 21,4 % azdır.

Ötən il sürücü daxil olmaqla 10 nəfər və yaxud daha çox adam daşımaq üçün nəzərdə tutulmuş motorlu nəqliyyat vasitələrinin idxalı 5 ədəd və yaxud 13,9 % azalaraq 31 ədəd (3 mln 872,96 min ABŞ dolları dəyərində), əsasən adamların daşınması üçün nəzərdə tutulmuş minik avtomobilləri və digər motorlu nəqliyyat vasitələrinin idxalı 1 322 ədəd və yaxud 23,78 % azalaraq 4 238 ədəd (43 mln 191,76 min ABŞ dolları dəyərində) təşkil edib.

Bu avtomobillərin 459-u (2 mln 321,3 min ABŞ dolları dəyərində) daxili yanma mühərriklə yanaşı, elektrik mühərriklə də hərəkətə gətirilən nəqliyyat vasitələri, 2-si (258,49 min ABŞ dolları dəyərində) isə yalnız elektrik mühərriklə hərəkətə gətirilən nəqliyyat vasitələridir.

Bu isə birincinin 200 ədəd yaxud 30,35 %, ikincinin isə 5 ədəd yaxud 71,42 % azalması deməkdir.

Bundan əlavə, yük daşımaq üçün mühərrikli nəqliyyat vasitələrinin idxalı 75 ədəd və yaxud 25,68 % artaraq 367 ədəd (5 mln 723,62 min ABŞ dolları dəyərində), xüsusi təyinatlı motorlu nəqliyyat vasitələrinin idxalı isə 12 ədəd və yaxud 66,67 % azalaraq 6 ədəd (656,25 min ABŞ dolları dəyərində) olub.