Yaddaqalan "Caspian Air Cargo Summit 2023" 40-dan çox ölkədən iştirakçıları qəbul etdi

Oktyabrın 23-25-də Xəzər dənizi və Mərkəzi Asiya regionlarının aparıcı yükdaşıma aviaşirkətlərindən biri olan "Silk Way West Airlines" "JW Marriott Absheron Baku" otelində "Caspian Air Cargo Summit 2023" tədbirini keçirib.

Bu sammit dünyanın hər yerindən nüfuzlu iştirakçıları Xəzər dənizinin sahilinə cəlb edən, regionun ən böyük və əhatəli aviasiya tədbiridir.

"Caspian Air Cargo Summit 2023" dövlət rəsmiləri, beynəlxalq hava yükdaşımaları sənayesinin liderləri və logistika ekspertlərini Azərbaycanın paytaxtında bir araya toplayıb. Bu böyük tədbirdə 40-dan artıq ölkəni təmsil edən 400-ə yaxın iştirakçı, eləcə də "Silk Way West Airlines" şirkətinin dünya üzrə 18 regional ofis nümayəndələri iştirak edib.

İki gün davam edən konfransda hava yükdaşımaları sektorunda mövcud trendlər, problemlər və imkanlar müzakirə olundu və gələcək üçün innovativ həll yolları araşdırılıb. "Boeing", "Airbus", "Embraer", TIACA, "Turkish Airlines", "ACL Airshop", "Rolls-Royce", "GE Aerospace", "Alibaba Group", "Kales Group", "dnata", "Hactl" və başqaları kimi qlobal hava yükdaşımaları sənayesinin əsas oyunçularının nümayəndələri dəyərli məlumat və yenilikləri paylaşıblar, yük təyyarələrinin və yeni nəsil mühərriklərin gələcəyi, həmçinin logistika və təchizatda davamlılıq və innovasiya ətrafında müzakirələr apardılar, habelə logistika və hava yükdaşımalarında elektron ticarətin artan rolu haqqında danışıblar.

Tədbirin yaddaqalan anlarından biri də paytaxtın ən təntənəli güşəsi olan Gülüstan sarayında təşkil edilmiş qala-ziyafət olub. Qonaqlar Azərbaycanın zəngin mədəni irsinin parlaq nümayişini təmin edən unudulmaz musiqi proqramından həzz alıblar.

“Hava yükdaşımaları sənayesində indiyə qədər görünməmiş turbulentlik və transformasiya dövründə "Caspian Air Cargo Summit 2023" əlaqələrin gücləndirilməsi və gələcək üçün mühüm proqnozların əldə edilməsində vacib platformaya çevrilib. 2006-cı ildə əsası qoyulmuş və artıq ölkənin aparıcı biznes forumlarından biri olan bu sammit 9-cu dəfə keçirilib. Builki tədbir sektorumuzun dinamizmini nümayiş etdi, yeni perspektivlər açdı və əsas sənaye oyunçularını gələcəyə ümumi baxışla birləşdirərək record sayda iştirakçı toplayıb”, - "Silk Way West Airlines"in prezidenti Volfqanq Mayer bildirib.

Əsası 2012-ci ildə İpək yolunun qəlbi sayılan Bakıda qoyulmuş "Silk Way West Airlines" Heydər Əliyev Beynəlxalq Aeroportunda yerləşən 13 müasir "Boeing 777F", "Boeing 747-8F" və "747-400F" yük təyyarəsindən ibarət donanması ilə dünyanın müxtəlif ölkələrinə hər ay yüzlərlə uçuş həyata keçirir. Donanmasını genişləndirən "Silk Way West Airlines" 28 aprel 2021-ci ildə beş yeni "777F" təyyarəsinin alınması üçün "Boeing" ilə strateji müqavilə imzalayıb, ardınca daha iki ən müasir "777-8F" yük təyyarəsinin alınması üçün 10 noyabr 2022-ci ildə müqaviləyə imza atıb, həmçinin 28 iyun 2022-ci ildə "Airbus" ilə 2 A350F yük təyyarəsinin alınması barədə razılığa gəlib.

Aviaşirkətin illik yükdaşıma dövriyyəsi 500 000 tondan artıqdır, genişlənən marşrut şəbəkəsi isə Amerika, Avropa, MDB ölkələri, Yaxın Şərq, Mərkəzi və Şərqi Asiya üzrə 40-dan çox istiqaməti əhatə edir.

Dünyanın aparıcı aerokosmik şirkəti olaraq, "Boeing" 150-dən çox ölkədə müştərilər üçün kommersiya təyyarələri, müdafiə məhsulları və kosmik sistemlər yaradır, istehsal edir və onlara xidmət göstərir. ABŞ-ın aparıcı ixracatçısı kimi şirkət iqtisadi imkanları, davamlılığı və sosial təsirləri inkişaf etdirmək üçün qlobal təchizatçı bazasının gücündən istifadə edir.

"Boeing"in çoxmillətli komandası gələcək üçün innovasiyalar etməyə, davamlılıqda lider olmağa və şirkətin təhlükəsizlik, keyfiyyət və dürüstlük kimi əsas dəyərlərinə əsaslanan mədəniyyətini inkişaf etdirməyə sadiqdir.