Şənlik mərasimlərində iştirak edən 230 min qonağın sənədlərinə baxılıb

Daxili İşlər Nazirliyi, Qida Təhlükəsizliyi Agentliyi və İqtisadiyyat Nazirliyi yanında Dövlət Vergi Xidmətinin mütəxəssislərindən ibarət monitorinq qrupları Bakıda, eləcə də digər şəhər və rayonlarda şənlik mərasimləri təşkil edilən obyektlərdə nəzarət tədbirlərini davam etdirir.

"Report" bu barədə İqtisadiyyat Nazirliyinə istinadən xəbər verir.

Məlumata görə, bu günə qədər 1 650-dən çox obyektdə qayda və şərtlərə əməl olunması vəziyyəti araşdırılıb. Təhlillər göstərir ki, maarifləndirmə tədbirləri başlayan dövrlə müqayisədə şadlıq evlərinin əksəriyyətində tələblərə əməl olunur.

Növbəti monitorinqlər zamanı şənlik mərasimlərinin icaze.e-gov.az portalında qeydiyyatdan keçirilməsi, tədbir təşkil edilən məkanların ərazisi, stollar ətrafında və arasında məsafə, sanitar-gigiyena qaydalarına riayət olunması, işçi heyətin müvafiq vasitələrlə (tibbi maska, əlcək və digər fərdi qoruyucu vasitələr) təmin edilməsi, qonaqların COVID-19-a qarşı peyvənd edilməsi və ya sağalaraq immunitetə malik olması barədə təsdiqedici sənədin mövcudluğu və s. məsələlər araşdırılıb. Toy və məkan sahibləri ilə profilaktik söhbətlər aparıb, Operativ Qərargahın müəyyənləşdirdiyi qayda və tələblərə ciddi riayət olunmasının vacibliyi izah edilib. Nöqsanların aşkar olunduğu məkanlarda pozuntular aradan qaldırılıb, toy mərasiminin qaydalara uyğun keçirilməsi təmin edilib və nümunəvi şənlik mərasimlərində ailə quranlara hədiyyələr təqdim olunub.

İndiyə qədər monitorinq aparılməş şənlik mərasimlərində iştirak edən 230 minə yaxın qonağın müvafiq sənədlərinə baxılıb, 21 minə yaxın nöqsan aşkar olunub. Həmçinin, şənlik təşkil edilən məkanların işçi heyəti arasında 900-dən çox şəxsin tələblərə əməl etmədiyi müəyyənləşdirilib.