Şəki-Zaqatala iqtisadi rayonundakı sahibkarlara 874 min manat güzəştli kredit verilib

Bakı. 30 noyabr. REPORT.AZ/ Bu gün İqtisadiyyat Nazirliyinin Sahibkarlığa Kömək Milli Fondu (SKMF) Balakəndə sahibkarlığın güzəştli kreditləşdirilməsi məsələlərinə dair işgüzar forum keçirib. 

Bu barədə “Report”a Nazirliyin mətbuat xidmətindən məlumat verilib.

Məlumata görə, tədbir çərçivəsində Balakən rayonunun iqtisadi potensialının reallaşdırılması məqsədilə prioritet hesab olunan “start-up” layihələrin maliyyələşdirilməsi, çörək istehsalı və meyvəqurutma, tütün, fındıq və süd emalı müəssisələrinin, tütünçülük və bağçılıq təsərrüfatlarının, tütünqurutma kameralarının, barama qəbulu və emalı məntəqələrinin, otelin yaradılması üzrə nümunəvi investisiya layihələrinin təqdimatı keçirilib, kiçik həcmli investisiya layihələrinin ümumi dəyərinin 100%-dək hissəsinin dövlətin güzəştli kreditləri hesabına maliyyələşdiriləcəyi bildirilib, sahibkarlara nümunəvi layihələr və metodiki materiallar paylanıb.

İşgüzar forumda çıxış edən SKMF-in şöbə müdiri Samir Hümbətov bildirib ki, 2017-ci ilin ötən dövrü ərzində 1700-dək sahibkarın investisiya layihəsinin maliyyələşdirilməsi məqsədilə 114 mln. manat güzəştli kredit verilib. Bu kreditlərdən istifadə etməklə investisiya layihələrinin reallaşdırılması 5100-dək yeni iş yerinin yaradılmasına imkan verir. 

Onun sözlərinə görə, ümumilikdə indiyə qədər Şəki-Zaqatala iqtisadi rayonunda fəaliyyət göstərən sahibkarlıq subyektlərinin 2270-dək investisiya layihəsinin maliyyələşdirilməsinə 102,4 mln. manat güzəştli kredit verilib. 

Tədbir çərçivəsində Şəki-Zaqatala iqtisadi rayonunda fəaliyyət göstərən sahibkarlara 874 min manat güzəştli kredit ayrılıb. Verilən kreditlər heyvandarlıq, quşçuluq, bağçılıq, tütünçülük, mebel istehsalı və s. sahələrin inkişafına yönəldiləcək. Bu kreditlərin reallaşdırılması hesabına 150-dək yeni iş yerinin açılması mümkün olacaq.

Forum çərçivəsində Balakən rayonunda güzəştli kredit ayrılmış tütünçülük təsərrüfatına baxış keçirilib.

Qeyd edək ki, bu ilin ötən dövrü ərzində tütünçülüyün inkişafı ilə bağlı 100-ə qədər sahibkara 1,6 mln. manat güzəştli kredit verilib.