Prezidentin köməkçisi: “Ümid edirik ilin sonuna böyük itkilərlə çıxmayacağıq”

"İlin əvvəlindən dövlət büdcəsinin gəlirləri tam icra olunub, hətta profisitlə icra olunur".

“Report” xəbər verir ki, bunu  Azərbaycan Respublikası Prezidentinin köməkçisi – Azərbaycan Respublikası Prezidentinin Administrasiyasının İqtisadi məsələlər və innovativ inkişaf siyasəti şöbəsinin müdiri Şahmar Mövsümov Operativ Qərargahın brifinqində bildirib:

“İqtisadiyyatımızda işsizliyin artmasının qarşısının alınması üçün həyata keçirilmiş tədbirlərin və Prezident tərəfindən verilmiş paketlərin nəticəsində işsizliyin artımı o qədər də görünmür. Azərbaycanda 190 manat verilən yardım işsiz insanlara sosial yardım kimi verilir. Bizdə bu proqram Gürcüstana nisbətən dəfələrlə  genişdir. Bu proses davam edəcək.İnflyasiya sabit qalır. İnvestisiya proqramlarının həyata keçirilməsində hər hansı gecikmələr yoxdur. Ümid edirik ki, ilin sonuna böyük itkilərlə çıxmayacağıq".

O qeyd edib ki, valyuta bazarında da tam sabitlik bərqərar olunub.

“Neftin qiymətinin dəyişkənliyi bir qədər səngiyib və Azərbaycan makroiqtisadi vəziyyətinə uyğun səviyyədə tarazlaşıb. Ona görə də ehtiyatlarımızın azalması çox cüzidir. Bütün bunlar yaxşı zəmin yaradır ki, Azərbaycan pandemiya dövrü bitdikdən sonra bu resurslardan istifadə edərək qısa müddətdə tənəzzüldən çıxaraq əvvəlki sürətli inkişafına qayıda biləcək”, - o vurğulayıb.