Nazir: “Qazaxıstan Azərbaycan ilə maksimum əməkdaşlıq hədəfləyir”

“Qazaxıstan Azərbaycan ilə infrastruktur layihələrinin inkişaf etdirilməsində maraqlıdır”.

"Report" xəbər verir ki, bunu Qazaxıstanın Baş nazirinin müavini, ticarət və inteqrasiya naziri Serik Jumanqarin Bakıda keçirilən Azərbaycan və Qazaxıstan arasında ticarət-iqtisadi əməkdaşlıq üzrə Birgə Hökumətlərarası Komissiyanın 19-cu iclasında deyib.

“Biz Transxəzər Beynəlxalq Nəqliyyat Marşrutu çərçivəsində işləri sürətləndirməyi təklif edirik”, - nazir bildirib. O, Qazaxıstan və Azərbaycanın enerji sektorunda və İKT sahəsində əməkdaşlığı inkişaf etdirməyə davam etdiyini qeyd edib.

"Pandemiya rəqəmsallaşmanın inkişafına təkan verib. Xəzər dənizinin dibi ilə fiber-optik kabel xəttinin çəkilməsi də xüsusi əhəmiyyət kəsb edir. Biz Azərbaycan ilə maksimum əməkdaşlıq hədəfləyirik və təkliflərə həmişə açığıq”, - Serik Jumanqarin bildirib.