Fransalı iş adamları Vergi Məcəlləsinə gözlənilən dəyişikliklər barədə məlumatlandırılıb

İqtisadiyyat Nazirliyi yanında Dövlət Vergi Xidməti və Fransa-Azərbaycan Ticarət Palatasının birgə təşkilatçılığı ilə görüş keçirilib.

"Report" Dövlət Vergi Xidmətinə istinadən xəbər verir ki, görüşdə Palata üzvlərinə növbəti il üçün Vergi Məcəlləsində edilməsi nəzərdə tutulan dəyişikliklərin əsas istiqamətləri barədə ətraflı məlumat verilib.

Qeyd olunub ki, Dövlət Vergi Xidmətinin sahibkar birlikləri və assosiasiyaları ilə əməkdaşlığının əsas istiqamətlərindən biri də vergi siyasətinin müəyyənləşdirilməsi prosesində fikir mübadiləsinin aparılması və təkliflərin öyrənilməsi üçün müvafiq görüşlərin keçirilməsidir.

Dövlət Vergi Xidmətinin Vergi siyasəti, Beynəlxalq vergitutma və vergi monitorinqi baş idarələrinin rəhbər vəzifəli şəxslərinin iştirakı ilə keçirilən görüşdə Vergi siyasəti baş idarəsinin rəisi Nicat İmanov dəyişikliklərin əsas istiqamətlərini özündə əks etdirən təqdimatla çıxış edib.

Tədbirdə Vergi Məcəlləsinə dəyişikliklərlə bağlı yaranan suallar cavablandırılıb.