"B2B FMCG” forumunda sahibkarların üzləşdikləri çətinliklər müzakirə olunub

Caspian European Club onlayn “B2B FMCG” forum keçirib. Forum çərçivəsində FMCG şirkətlərinin COVID-19 koronavirus pandemiyası dövründə üzləşdikləri məsələ və təkliflər müzakirə olunub.

“Report” xəbər verir ki, bu barədə Caspian European Club və Caspian Energy qrupunun sədri və baş icraçı direktoru Telman Əliyev məlumat verib.

Bildirilir ki, üç saat davam edən onlayn “B2B FMCG” forum çərçivəsində müzakirələrə həmçinin Kənd Təsərrüfatı Nazirliyi yanında Aqrar Tədqiqatlar Mərkəzinin direktor müavini Namiq Şalbuzov, Qida Təhlükəsizliyi Agentliyinin Qeydiyyat və Sahibkarlarla İş şöbəsinin müdiri Orxan Mikayıl və  Qida zəncirinə nəzarət və regional bölmələrə iş şöbəsinin Sertifikatlaşdırma və idxal-ixraca nəzarət sektorunun müdiri Fərid Əmirov, Dövlət Gömrük Komitəsinin Gömrük prosedurlarının idarə olunması şöbəsinin rəisi Elçin Rüstəmov və Baytarlıq, sanitariya və fitosanitariya şöbəsinin rəisi Günay Salamova, Sumqayıt şəhəri üzrə Kiçik və Orta Biznesin İnkişafı Agentliyinin (KOB dostu) nümayəndəsi Elmar Rzayev, Azexport.az portalının idarəedici meneceri Ayxan Qədəşov və iqtisadiyyatın müxtəlif sahələrini təmsil edən dövlət və özəl şirkətlərin top-menecerləri də qoşulublar.

Məlumatda deyilir ki, Caspian European Club tərəfindən yaradılmış B2B forum beynəlxalq biznes-netvorkinq üçün unikal platformadır. Forum çərçivəsində biznes nümayəndələri qısa təqdimatlar keçirir, öz fəaliyyətləri barədə danışır, sahənin problemləri ilə bölüşür və onların həlli yollarını təklif edirlər.

Həftədə iki dəfə keçirilən onlayn B2B forumlar Azərbaycan, Gürcüstan, Qazaxıstan, həmçinin digər Xəzər-Qara dəniz və Baltik regionu ölkələrinin iqtisadiyyatının müxtəlif sahələrindən olan şirkət rəhbərləri ilə qeyri-rəsmi şəraitdə ünsiyyət və yeni işgüzar əlaqələr qurmaq üçün əlavə platformadır.

Xatırladaq ki, sıralarında dünyanın 50 ölkəsindən 5 mindən artıq şirkət və təşkilatı birləşdirən Caspian European Club 2002-ci ilin iyununda yaradılıb. Caspian European Clubun əsas məqsədi Azərbaycanda və Caspian European Club-un fəaliyyət göstərdiyi digər ölkələrdə investisiya və işgüzar mühitin yaxşılaşdırılmasından, həmçinin B2G, B2B və B2C formatlarında dialoqu stimullaşdırmaqdan və onlarda fəal iştirak etməkdən ibarətdir. Caspian European Clubun mənzil-qərargahı Bakıda (Azərbaycan) yerləşir. Caspian European Clubun Gürcüstan və Qazaxıstanda rəsmi nümayəndəliyi, ABŞ, Almaniya, Polşa, Latviya və Çexiyada səlahiyyətli nümayəndələri var.