Azərbaycanda ilk dəfə Təchizat Zənciri Liderləri Zirvəsi keçirilir

Bu gün Azərbaycanda ilk dəfə Təchizat Zənciri Liderləri Zirvəsi keçirilir.

"Report" xəbər verir ki, Bakıda təşkil olunan tədbirin məqsədi təchizat zəncirinin inkişafı və idarəedilməsi istiqamətində bilik və təcrübələri paylaşmaq, təchizat zənciri prosesləri üçün sərfəli həllər tapmaq, satınalma proseslərini sadələşdirmək və səmərəliliyi artırmaq üçün rəqəmsal alətlər təklif etməkdir.

Tədbirə 600-dək peşəkar mütəxəssis, dövlət və özəl sektordan olan təchizat, satınalma rəhbərləri, istehsalçı, distribüter, topdansatış, pərakəndə satıcı və istehlakçıları qatılıb.

Tədbir ölkəmizdə satınalma və təchizat sahəsinin inkişafına dəstəyi və sahə üzrə yerli kadrların daha da təkmilləşdirilməsini hədəfləyir.

Zirvə görüşündə "Dövlət Satınalmaları: Rəqabətdə Şəffaflıq", " Təchizat Zəncirinin Strateji İdarəedilməsi", "Təchizat Zənciri: Gələcəyin Dizaynı" panelləri üzrə təchizatda risklərin idarə olunması, təchizat zəncirinin strateji dayaqları, logistika, rəqəmsal transformasiya və süni intellektin tətbiqi və sahəyə dair digər mövzular haqqında müzakirələr aparılacaq.