Azərbaycan Zərgərlər Assosiasiyası qızıl bazarındakı vəziyyəti açıqlayıb

"Bu gün Azərbaycanda iqtisadiyyatın bir sıra sahələri kimi zərgərlik sahəsi də çətinliklərlə üzləşib".

"Report" xəbər verir ki, bunu Azərbaycan Zərgərlər Assosiasiyasının sədri Toğrul Abbasquliyev bildirib.

"Zərgərlik bazarının 75%-i toy-nişan mərasimləri hesabına formalaşır. Hazırda koronavirus (COVID-19) pandemiyası ilə əlaqədar həmin mərasimlərin keçirilməsinə məhdudiyyətlər var və bu, bazara böyük təsir göstərir. Bundan əlavə, zərgərlik sənayesinin satıcılarının 90%-dən çoxu ticarət mərkəzlərində - "Moll" larda fəaliyyət göstərir. Sözsüz ki, ticarət mərkəzlərinin bağlanması zərgərlik fəaliyyətində böyük məhdudiyyətlərə səbəb olur. Həmçinin ölkəyə turistlərin gəlməsinə tətbiq edilmiş məhdudiyyətlər zərgərlik məmulatlarının satışında müəyyən bir payın itirilməsi deməkdir", - o deyib.

Assosiasiya sədri yerli sənayenin daxili bazardakı payı barədə danışıb: "Daxili bazarda qeyri-şəffaflıq mövcuddur, amma yerli sənaye bazarda 50-60% arası paya malikdir".