“Azərbaycan Sənaye Korporasiyası” startap bazarına dəstək verəcək

“Azərbaycan Sənaye Korporasiyası” ASC (ASK) ilə Azərbaycan Dövlət İqtisad Universiteti (UNEC) arasında təhsil, elm və təlim-tədris sahəsində əməkdaşlığa dair Anlaşma Memorandumu imzalanıb. 

Bu barədə “Report”a ASK-nın Mətbuat xidmətindən məlumat verilib.

Bildirilib ki, sənədi Korporasiyanın baş direktoru Kamran Nəbizadə və Universitetin rektoru Ədalət Muradov imzalayıblar.

Anlaşma Memorandumu qeyri-neft sektorunun inkişaf etdirilməsi məqsədi ilə əməkdaşlığın, birgə tədqiqatların aparılmasının və proqramların həyata keçirilməsinin, tələbələrin biznes ideyalarının formalaşdırılmasının, innovativ təşəbbüslərinin, startap fəaliyyətinin dəstəklənməsinin, onların praktiki tətbiqinin, UNEC tələbələrinin ASK və onun törəmə müəssisələrində təcrübə keçməsinin əsaslarının müəyyənləşdirilməsi istiqamətində əməkdaşlığa xidmət edir.

Tədbiri giriş sözü ilə açan Ədalət Muradov bildirib ki, müasir təhsil sistemi real iqtisadiyyatın tələblərinə uyğun olmalıdır və bu uyğunluğun da əsasını məhz birgə əməkdaşlıqlar təşkil edir. Ali təhsil müəssisələrində hazırlanan kadrların real iqtisadi mühitdə, əmək bazarında formalaşdığını vurğulayan Universitetin rektoru qeyd edib ki, real mütəxəssislərin hazırlanması məhz real əməkdaşlıqlardan asılıdır.

ASK-nın yaranma tarixi və hazırki fəaliyyətindən bəhs edən Kamran Nəbizadə, öz növbəsində, qeyd edib ki, Cəmiyyətin qarşısında duran əsas məqsədlərdən biri müəssisələrdə işin düzgün təşkili, rentabelliyi yüksəltmək, istehsalı genişləndirmək, müəssisələr arasında əməkdaşlığı gücləndirməkdir. İxtisaslı və peşəkar kadrlar bu məqsədlərin əldə edilməsində böyük rol oynayır. Korporasiyanın baş direktoru onu da bildirib ki, Memorandumun uğuru bu anlaşmanın ikitərəfli şəkildə fəal icrasından asılıdır.

UNEC-i bitirən məzunların ASK-nın mütəxəssis bazasına daxil olması, həmin Universitetin üç tələbəsinə Cəmiyyət tərəfindən təqaüd ayrılması və bu ali təhsil ocağı tərəfindən Korporasiya, eləcə də onun törəmə müəssisələrində çalışan mütəxəssislər üçün ixtisasartırma kurslarının təşkili təməli qoyulan bu əməkdaşlığın vacib və əhəmiyyətli məqamlarındandır.