Azərbaycan Qazaxıstana daha bir ixrac missiyası göndərəcək

Bakı. 10 iyul. REPORT.AZ/ Bu ilin sonuna kimi Azərbaycan şirkətlərindən ibarət daha bir ixrac missiyasının Qazaxıstana səfəri planlaşdırılıb.

"Report" Qazaxıstan mətbuatına istinadən xəbər verir ki, bunu Azərbaycanın iqtisadiyyat nazirinin müavini Sahil Babayev bildirib.

Qeyd edək ki, orta Asiya ölkəsinə ilk ixrac missiyası qeyri-neft sektorunun dəstəklənməsi məqsədilə bu ilin aprel ayında reallaşdırılıb. Missiyada tikinti materialları, kimya sənayesi, maşınqayırma, yüngül sənaye, ətir və kosmetika, meyvə-tərəvəz, alkoqollu və alkoqolsuz içkilər, konservləşdirilmiş qida məhsulları, çay istehsalı ilə məşğul olan şirkətlər iştirak ediblər.

Səfər zamanı mineral sular, müalicəvi Naftalan mazı, limonad və şərab məhsulları Qazaxıstan tərəfinin xüsusi marağına səbəb olub. Bu ixrac missiyasının istiqaməti ixracatçı şirkətlərin müraciəti əsasında müəyyənləşdirilib.

2017-ci ilin sonuna qədər Rusiya, Qazaxıstan, Səudiyyə Ərəbistanı, eləcə də bir sıra Avropa ölkələrinə ixrac missiyalarının həyata keçirilməsi planlaşdırılır. Bu missiyalar "Made in Azerbaijan" milli brendinin təşviq olunması məqsədilə təşkil olunur.