Prezident İlham Əliyev pakistanlı həmkarına təbrik məktubu göndərib

Bakı. 22 mart. REPORT.AZ/ Azərbaycan Prezidenti İlham Əliyev pakistanlı həmkarı Məmnun Hüseynə təbrik məktubu göndərib.

"Report"un məlumatına görə, İlham Əliyev məktubunda Pakistan xalqını ölkənin milli bayramı münasibəti ilə təbrik edib:

"Hörmətli cənab Prezident,

Ölkənizin milli bayramı – Pakistan Günü münasibətilə Sizi və Sizin simanızda bütün xalqınızı öz adımdan və Azərbaycan xalqı adından səmimi qəlbdən təbrik edirəm.

Azərbaycan-Pakistan əlaqələri ortaq mənəvi dəyərləri bölüşən qardaş xalqlarımızın iradəsindən qaynaqlanır. Qarşılıqlı inam, etimad və dəstəyə əsaslanan dövlətlərarası münasibətlərimizin hazırkı yüksək səviyyəsini xüsusi qeyd etmək istəyirəm.

İnanıram ki, strateji tərəfdaşlığımızın və müttəfiqliyimizin, ikitərəfli və çoxtərəfli qaydada əməkdaşlığımızın inkişafı və möhkəmlənməsi yolunda birgə addımlarımız bundan sonra da xalqlarımızın və ölkələrimizin mənafelərinə xidmət edəcəkdir.

Bu xoş gündə Sizə möhkəm cansağlığı, işlərinizdə uğurlar, qardaş Pakistan xalqına sülh və rifah diləyirəm".