Səhiyyə Nazirliyi Lənkəranda qəzada xəsarət alanların son vəziyyətini açıqlayıb

Səhiyyə Nazirliyi Lənkəranda baş verən yol nəqliyyat hadisəsində xəsarət alanların son vəziyyəti ilə bağlı məlumat yayıb. 

Nazirlikdən "Report"a verilən məlumata görə, Lənkəran Mərkəzi Rayon Xəstəxanasında hazırda 5 nəfərin müalicəsi davam edir. 

Qeyd olunub ki, onlardan biri reanimasiyada, digər 4 nəfər isə travmatologiya şöbəsində palatadadır.

Qeyd edək ki, avqustun 28-də Lənkəran rayonunun Bəliton kənd sakini Ağayev Ələmdar Şavəli oğlunun idarə etdiyi, ona məxsus şəxsi istifadəsində olan PAZ markalı 43-BA-455 dövlət nömrə nişanlı avtobusu yüksək dağlıq ərazidə yolsuzluq və qapalı şəraitdə fərdi yaşayış evinin həyətinə aşıb. Sürücü hadisə zamanı dünyasını dəyişib. Avtobusda olan 22 nəfər sərnişin xəsarət alıb.