Ağdamın Quzanlı qəsəbəsində ödənişsiz səyyar tibbi xidmət aksiyası keçirilib

Bu gün “Azərbaycan Dəmir Yolları” QSC Həkim-Sanitar Xidmətinin tabeçiliyində olan 1 saylı Bakı dəmir yolu xəstəxanasının və Ağdam “Medilife” Klinikasının birgə təşkilatçılığı ilə Ağdam rayonu Quzanlı qəsəbəsində ödənişsiz səyyar tibbi xidmət aksiyası keçirilib.

Bu barədə “Report”a “Azərbaycan Dəmir Yolları” QSC-dən məlumat verilib. Bildirilib ki, aksiyanın keçirilməsində məqsəd cəbhəyanı ərazilərdə yaşayan yerli və ətraf rayon sakinlərinin, eləcə də qaçqın və məcburi köçkün ailələrinin yüksək keyfiyyətli səhiyyə xidmətindən istifadə etməklə sağlamlığının qorunmasına imkan yaratmaq olub.

Gün ərzində 100-dən çox yerli sakinə yüksək səviyyədə tibbi xidmət göstərilib.

Aksiyada qastroenteroloq-hepatoloq İlqar Alışov, dermato-veneroloq androloq İbrahim Rzayev və ümumi cərrah Ramil Nəsirov kimi peşəkar həkim heyəti cəbhəyanı bölgədə yaşayan soydaşlarımızı müayinə və müalicə ediblər.