Azərbaycan gömrükçüləri 21 ədəd mobil telefon aşkar edib

Bakı. 19 sentyabr. REPORT.AZ/ Dövlət Gömrük Komitəsi (DGK) Yevlax Gömrük İdarəsinin əməkdaşları ölkə ərazisinə qeyri-qanuni yollarla gətirilmiş mobil telefonlar və aksesuarlarının realizə edilməsinin qarşısını alıblar.

“Report” DGK-ya istinadən xəbər verir ki, idarənin Gömrük hüquqpozmalarına qarşı mübarizə şöbəsinə daxil olan əməliyyat məlumatı əsasında Azərbaycan vətəndaşının idarə etdiyi "Toyota Land Cruiser Prado" markalı avtomobilini Mingəçevir şəhəri, Heydər Əliyev prospektində gömrükçülər saxlayıb və nəqliyyat vasitəsi gömrük baxışı keçirilməsi məqsədilə Yevlax Gömrük İdarəsinin inzibati binasının həyətinə gətirilib.

Aparılan yoxlama zamanı avtomobilin yük yerindən 5 ədəd "Samsung Galaxy J3 Pro Gold", 10 ədəd "Samsung Galaxy J3 Pro Black", 5 ədəd "Samsung Galaxy A3", 1 ədəd "Samsung Galaxy A5 Gold" markalı mobil telefonlar və aksesuarları aşkar olunub.

Faktla bağlı araşdırma aparılır.