Bakı. 27 sentyabr. REPORT.AZ/ Dayazsulu “Günəşli” yatağının 19-cu dərin dəniz özülündə 71 saylı quyuda yanğın söndürüldükdən sonra təmir-bərpa işləri başlayıb.
“Report” xəbər verir ki, bu barədə “Azərbaycan Xəzər Dəniz Gəmiçiliyi” Qapalı Səhmdar Cəmiyyəti məlumat yayıb.
Məlumatda qeyd olunub ki, hazırda AXDG-nin “G.Şıxlinski” və “Şirvan-2” kran gəmiləri, “Nefteqaz-64”, “Aura”, “Om” təchizat-yedək gəmiləri, Gəmiçiliyə məxsus, Fövqəladə Hallar Nazirliyi tərəfindən idarə olunan “Vixr-5” və “AXDG - BUE Caspian Alyansı”nın “Caspian Server” gəmiləri qəzanın nəticələrinin aradan qaldırılması ilə əlaqədar aparılan işlərə cəlb olunub.
Açıqlamada həmçinin bildirilib ki, sentyabrın 26-da SOCAR-ın “Günəşli” yatağındakı 19-cu stasionar dərin dəniz özülündə 71 saylı quyuda baş vermiş qəzanın aradan qaldırılmasında və saat 18:00-dan sonra başlamış yanğının söndürülməsinə Azərbaycan Xəzər Dəniz Gəmiçiliyinə (AXDG) məxsus “Nefteqaz-10” və “Nefteqaz-64”, AXDG-yə məxsus, FHN tərəfindən idarə olunan “Vixr-5” və “Vixr-7” gəmiləri ilə bərabər, “BP-Azerbaijan” şirkətinin rəhbərliyinin razılığı və köməkliyi ilə həmin şirkətə xidmət göstərən gəmilər də cəlb edilib: “Belə ki, Xəzərdə ən böyük yedək-təchizat gəmisi olan Gəmiçiliyin “Lənkəran” gəmisi, AXDG - BUE Caspian Alyansının həmin şirkətə xidmət göstərən “Topaz Dignity”, “Caspian Protektor”, “Caspian Voyager” gəmiləri və onların heyətləri qəzanın aradan qaldırılmasında xüsusi rol oynayıb”.