Azərbaycan OPEC qarşısında öhdəliyini noyabrda da tam icra edib

Bakı. 6 dekabr. REPORT.AZ/ Energetika Nazirliyi OPEC-ə üzv olan və kartelə daxil olmayan ölkələrin neft hasilatının azaldılması ilə bağlı Vyana razılaşmasına uyğun olaraq Azərbaycanın 2017-ci ilin noyabr ayı ərzində gündəlik neft hasilatı ilə bağlı məlumatları Birgə Monitorinq Komitəsinin Müştərək Texniki Komissiyasına təqdim edib.

"Report" Nazirliyə istinadən xəbər verir ki, həmin məlumatlara əsasən, noyabr da ölkə üzrə gündəlik neft hasilatı 790,7 min barel olub. Bunun 735,8 min barelini xam neft, 54,9 min barelini kondensat təşkil edib. Gündəlik 643,4 min barel xam neft, 54,9 min barel kondensat, 15 min barel isə neft məhsulları ixrac edilib.

Neft hasilatının azaldılması üzrə sazişə müvafiq olaraq Azərbaycan hasilatı gündəlik 35 min barel azaltmaqla bağlı götürdüyü öhdəliyi növbəti dəfə də tam yerinə yetirib.

Qeyd edək ki, ölkə üzrə gündəlik neft hasilatı yanvarda 793,9 min barel, fevralda 776,4 min barel, martda 733,3 min barel, apreldə 781,1 min barel, mayda 785,3 min barel, iyunda 793,7 min barel, iyulda 796,7 min barel, avqustda 734,8 min barel , sentyabrda 785,7 min barel, oktyabrda isə 800,6 min barel olub.

Xatırladaq ki, 2016-cı il noyabrın 30-da OPEC üzrə gündəlik neft hasilatının 1,2 mln. barel azaldılaraq 32,5 mln. barelə endirilməsi barədə razılıq əldə olunub. Dekabrın 10-da isə Vyanada OPEC üzvləri ilə təşkilata daxil olmayan 11 ölkə, o cümlədən Azərbaycan ümumi hasilatın gündəlik 558 min barel azaldılması barədə sazişə imza atıb.

Bu il mayın 25-də OPEC Nazirlər Şurasının 172-ci iclası çərçivəsində OPEC üzv və qeyri-üzv dövlətlər arasında neft hasilatının azaldılmasına dair sazişin müddətinin 2018-ci ilin I rübün sonunadək uzadılması barədə razılıq əldə olunub. Cari ilin noyabrın 30-da isə OPEC Nazirlər Şurasının 173-cü iclası çərçivəsində OPEC+ sazişinin 2018-ci ilin sonuna kimi uzadılması ilə bağlı qərar qəbul olunub. Bu, yeni razılaşmaya Azərbaycan da qoşulub.