Bakı. 9 mart. REPORT.AZ/ ATƏT-in Demokratik Təsisatlar və İnsan Haqları Bürosunun (DTİHB) uzunmüddətli müşahidə missiyasının üzvləri martın 15-dən Azərbaycanın bölgələrinə göndəriləcək.
"Report" xəbər verir ki, bu barədə ATƏT DTİHB-nin Azərbaycandakı prezident seçkiləri üzrə müşahidə missiyasının rəhbəri Korien Conker (Hollandiya) Bakıda keçirilən mətbuat konfransında bildirib.
Ümumilikdə, uzunmüddətli missiya 30 müşahidəçidən - 10 ekspertdən ibarət əsas heyət və martın 15-dən etibarən ölkənin regionlarına göndəriləcək 20 uzunmüddətli müşahidəçidən ibarətdir.
Azərbaycanda aprelin 11-də keçiriləcək prezident seçkilərini izləmək üçün DTHİB əlavə olaraq 280 qısamüddətli müşahidəçi gətirəcək. Ekspertlər və uzunmüddətli müşahidəçilər 19 ölkədən yığılıb.