Yuxarı

​Norveç Bakı 2015-də üç medal qazanmağı hədəfə alıb

Məqsədimiz son səkkiz komanda sırasına daxil olmaqdır

Bakı. 4 mart. REPORT.AZ/ "Məqsədimiz azı üç medal və bundan əlavə azı beş idman növündə son səkkiz komanda sırasına daxil olmaqdır".

"Report" "Baku2015.com"a istinadən xəbər verir ki, bu sözləri Norveçin Bakı 2015 nümayəndə heyətinin rəhbəri Tore Ovrebo Norveç Olimpiya Komitəsinin bir hissəsi olan və ölkənin elit idmançılarının hazırlanmasına görə məsuliyyət daşıyan “Olympiatoppen”in saytına müsahibəsində bildirib.

Ovrebo deyib ki, Norveçi güləş, karate, boks, velosiped idmanı, kamandan oxatma, triatlon və atıcılıq idman növləri üzrə təmsil edən idmançılar pyedestala çatmaq üçün potensiala malikdirlər.

"Rio 2016" Olimpiya Oyunları üçün atıcılıq və triatlon idman növləri üzrə kvota yerləri Bakı 2015-də qazanıla bilər.

"Norveç komandası üçün məqsəd Bakıda iki kvota yeri tutmaqdır," - deyə Ovrebo bildirib və belə əlavə edib:

"Norveç komandası istedad səviyyəsi, ambisiya və yaş baxımından müxtəlifliyi ilə seçilir. Bəzi idman növləri Bakıya medal qazanmaq potensialı olan görkəmli idmançılarla gedir. Digərləri çempionat təcrübəsi qazanmaq və gələcək böyük ambisiyalar üçün bünövrə qoymaq üçün gedirlər."

Cənab Ovrebo sözünə belə davam edib ki, bu yarış, həmçinin ölkənin bəzi gənc idmançılarının inkişaf prosesinin bir hissəsinə çevriləcək:

"Avropa Oyunları gənc idmançılar, xüsusən üzgüçülük idmanındakı azyaşlılar üçün müstəsna inkişaf arenası olacaq”.

Ovrebo qeyd edib ki, azyaşlılar arasında ruh yüksəkliyini artırmağa çalışırlar:

"Federasiya və Olympiatoppen razılaşırlar ki, Avropa Oyunlarında azyaşlılar qarşısında hədəflər qoyulmamalıdır. Əsas məqsəd ruh yüksəkliyi, motivasiya, öyrənmək və inkişaf olmalıdır."

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi