Yuxarı

​Azərbaycanın iki karateçisi yarımfinala vəsiqə qazanıb

Onlardan biri kişi, biri isə qadın idmançıdır

Bakı. 14 iyun. REPORT.AZ/ "Bakı 2015" I Avropa Oyunlarında karate üzrə yarımfinalçılar müəyyənləşib. "Report"un məlumatına görə, Azərbaycanın 2 idmançısı yarımfinala vəsiqə qazanıb.

Kumite növü üzrə 84 kq çəki dərəcəsində mübarizə aparan Ayxan Mamayev qrup ikincisi olaraq yarımfinala yüksəlib. O, seçmə mərhələdə əvvəlcə yunanıstanlı Georgios Michael Tzanosla sülh bağlayıb - 0:0. Daha sonra ukraynalı Yaroslav Horunanı 6:3 və farnsalı Kenyi Qrillonu 6:1 hesabı ilə məğlub edib. Onun yarımfinaldakı rəqibi kosovalı Karaqi Alvin olacaq. 

+84 çəki dərəcəsində döyüşən Şahin Atamov isə Oyunlarda mübarizəni dayandırıb. O, türkiyəli Enes Erkana 10:1 hesabı ilə məğlub olub. Ardınca makedoniyalı Martin Nestorovskiyə 5:3 hesabı ilə uduzan Atamov yunanıstanlı Spiridon Marqaritopoulosla da döyüşdən məğlub ayrılıb - 0:2.

Qadınların kumite yarışında 68 kq çəki dərəcəsində döyüşən İrina Zaretska mübarizəni yarımfinalda davam etdirəcək. Seçmə mərhələdə iki rəqibinə - ispaniyalı Kristina Vizcayno 6:1 və yunanıstanlı Vasiliki Panetsidouya 1:0 hesabı ilə qalib gələn Zaretska avstriyalı Alisa Teresa Buçingerə 0:4 hesabı ilə məğlub olub. Nəticədə Azərbaycan karateçisi qrupda 2-ci yeri tutub. Onun yarımfinaldakı rəqibi Monteneqro idmançısı Marina Rakoviç olacaq.

+68 kq çəki dərəcəsində kumite növü üzrə mübarizə aparan qadın karateçi Aytən Səmədli keçirdiyi hər 3 görüşü məğlubiyyətlə başa vurub. O, xorvatiyalı Masa Martinoviçə 1:2, fransalı Nadeqe Ait İbrahimə 0:5 və isveçli Hana Antunoviçə 1:9 hesabı ilə məğlub olaraq qrupun son pilləsində qərarlaşıb.

Qeyd edək ki, İrina Zaretska saat 15:58-də, Ayxan Mamayev isə 16:26-da döşək üzərinə çıxacaq.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi