Ucarda zərərvericilərə qarşı kimyəvi mübarizə dronla aparılır

Ucarda yeni texnologiya əsasında əkilmiş pambıq sahəsində dronla zərərvericilərə qarşı kimyəvi mübarizə aparılır.
Aqrar Elm və İnnovasiya Mərkəzinin (AEİM) Bitki Mühafizə və Texniki Bitkilər Elmi Tədqiqat İnstitutunun Ucarda yerləşən Şirvan Təcrübə Stansiyasında müasir texnologiya əsasında əkilmiş pambıq sahəsində növbəti lokal xarakterli kimyəvi mübarizə tədbiri həyata keçirilib. Dron vasitəsi ilə aparılmış mübarizə əkin sahəsində müşahidə olunan mənənə və tor gənəsinin məhv edilməsi məqsədi ilə icra olunub.

”Report"un”Yuxarı Şirvan bürosu xəbər verir ki, AEİM-in direktoru İmran Cümşüdov, BMTB ETİ-nin direktoru Elçin Xəlilov və digər mütəxəssislərin iştirakı ilə aparılmış müşahidələr zamanı ziyanvericilərin aktivliyi təsdiq edilib və dron vasitəsi ilə effektiv kimyəvi mübarizə aparılıb.

Dron vasitəsi ilə sahənin zərərvericilərdən qorunmasının bir sıra müsbət üstünlükləri var. Ənənəvi mexaniki metodla müqayisədə bitkilər əzilərək zədələnmir, bütün sahə deyil, yalnız ziyanvericilərin sirayət etdiyi ərazilərə pestisid vurulur ki, bu da zəhərli dərmanların ətrafa yayılmasının qarşısını alır, ekoloji tarazlığı qoruyur. İqtisadi baxımdan isə istehsal xərclərini aşağı salır, eyni zamanda, əkin aparılmış sahəni tam görməyə imkan yaratmaqla suvarmanın, alaqların yayılmasının səviyyəsini müəyyən etməyə imkan verir.

Qeyd edək ki, Şirvan Təcrübə Stansiyasının əkin sahəsində 2020-ci ilin məhsulu üçün Çin texnologiyası əsasında 10, türk texnologiyası əsasında isə 8 hektar əkin aparılıb. Torpaqbecərmə işləri Çin Xalq Respublikasından gətirilmiş diskli maladan istifadə edilərək həyata keçirilib, çiyid səpini müasir texnologiya ilə hazırlanmış aqreqatla aparılıb.

Ötən il çinli mütəxəssislərin iştirakı ilə 10 hektarda çiyid əkilib, aqrotexniki becərmələrin dəqiqliklə aparılması nəticəsində əkin sahəsində orta məhsuldarlıq 65 sentner təşkil edib. Bu il də sahələrdən yüksək məhsuldarlıq gözlənilir.