Yuxarı
    Bağlamaq

    Qazaxıstandan geri qaytarılmış Azərbaycan kartofunun keyfiyyəti yoxlanılıb

    Kənd Təsərrüfatı Nazirliyi məhsulun fitosanitar tələblərə uyğun olduğunu bəyan edir

    Bakı. 30 iyun. REPORT.AZ/ Bu ay Cəlilabad rayonunda yetişdirilən və Qazaxıstana ixrac olunan ümumilikdə 81,5 ton kartof məhsulu tərkibində karantin tətbiq edilən zərərli orqanizm - qızılı kartof nematodu (Globodera rostochiensis Behrens) aşkar edilməsi səbəbi ilə bu ölkədən geri qaytarılıb.

    “Report” xəbər verir ki, bu barədə Kənd Təsərrüfatı Nazirliyi (KTN) yanında Dövlət Fitosanitar Nəzarəti Xidmətinin (DFNX) açıqlamasında bildirilib.

    Məlumatda deyilir ki, geri qaytarılmış kartof məhsulundan təkrarən nümunələr götürülərək qurumun Respublika Karantin Ekspertiza Mərkəzinin Fitohelmintologiya laboratoriyasında yoxlanılıb və məhsulda sözügedən nematod aşkar edilməyib. Həmçinin Cəlilabad rayonunun kartof məhsulunun yetişdirildiyi əkin sahələrindən götürülmüş torpaq nümunələrində də nematod və yaxud onların sistalarına rast gəlinməyib.

    Geri qaytarılan kartof məhsulu fitosanitar tələblərə tam uyğundur. Bu barədə Qazaxıstanın Azərbaycandakı səfirliyi ilə əlaqə saxlanılıb, birgə komissiyanın təşkil olunaraq yüklərdən təkrarən nümunə götürülərək hər hansı üçüncü bir ölkənin müvafiq laboratoriyasında yoxlanılması təklif edilib. Bununla bağlı səfirliyin nümayəndəsi təqdim olunmuş materialların diplomatik kanallarla qarşı tərəfə çatdırılacağını və zəruri tədbirlərin görüləcəyini bildirib. 

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi