Bakı. 22 may. REPORT. AZ/ Polşa Azərbaycanla kənd təsərrüfatı sahəsində əməkdaşlıq etmək niyyətindədir. Bu gün Bakıda keçirilən beynəlxalq qida sərgisində Polşanın da ilk dəfə iştirak etməsi qarşılıqlı əlaqələrin möhkəmlənməsində daha bir addımdır.
"Report" xəbər verir ki, bunu Bakıda Azərbaycan şirkətləri üçün keçirilən "Made in Poland" adlı əməkdaşlıq imkanlarına dair seminarda Polşanın Azərbaycandakı səfiri Marek Tsalka bildirib.
Səfir deyib ki, mürəkkəb beynəlxalq münasibətilər, ölkələrin qarşılıqlı sanksiyalarına baxmayaraq, Polşa iqtisadiyyatı və kənd təsərrüfatı möhkəmliyini qoruyub saxlayır.
"Polşa Avropanın və Asiyanın bir çox ölkələri ilə əməkdaşlıq edir. İnanıram ki, Azərbaycan da həmin ölkələrin siyahısına daxil olacaq. Polşa bu ilin I rübündə 5,4 mlrd. avro həcmində ixrac həyata keçirib. Ölkədə maşın və kimyəvi məhsullardan sonra qida sənayesi ixrac səviyyəsinə görə üçüncü sıradadır", - deyə səfir Polşa şirkətlərinin əməkdaşlıq üçün imkanlarından danışarkən bildirib.