Yuxarı
    Bağlamaq

    Bakıda yararsız kolbasa məmulatları məhv edilib

    Baytarlıq-sanitariya cəhətdən yararsız məhsulları satmağa cəhd göstərən şəxs isə cərimələnib

    Bakı. 15 may. REPORT.AZ/ Mayın 5-də Bakıda aşkar edilmiş ümumi çəkisi 100 kq olan yararlıq müddəti bitən kolbasa və sosiska məhsullarının Respublika Baytarlıq Laboratoriyasında müayinəsinin nəticələri açıqlanıb.

    Dövlət Baytarlıq Nəzarəti Xidmətindən (DBNX) "Report"a daxil olan məlumata görə, aparılan bakterioloji müayinələrin nəticəsinə əsasən, götürülən nümunələrdə bakterioloji çirklənmə (BÇQB, salmonella aboreus, salmonella typhimurium) aşkar edilib. Bakterioloji və biokimyəvi müayinələrin nəticəsinə əsasən, yoxlanılan nümunələrin insan qidası üçün baytarlıq-sanitariya cəhətdən yararsız olması müəyyən edilib.

    Respublika Baytarlıq Laboratoriyasının müvafiq ekspertizasının nəticəsi nəzərə alınaraq insan səhhətinə ağır zərər yetirən, bakterioloji çirklənməyə məruz qalan, baytarlıq-sanitariya cəhətdən yararsız olan, qaraj şəraitində temperatur rejiminə əməl edilməyən, soyuducu sistemi olmayan, istifadəyə yararlıq müddəti bitən, qeyri-qanuni, antisanitar şəraitdə saxlanılan və satılan kolbasa və sosis məhsullarının zərərsizləşdirilməsinə qərar verilib.

    Bakı Şəhər Baytarlıq İdarəsi tərəfindən verilmiş qərara uyğun olaraq, bakterioloji çirklənməyə məruz qalan ümumi çəkisi 100 kq olan kolbasa və sosiska məhsulları baytarlıq mütəxəssislərinin nəzarəti altında Nərimanov rayonu, Əliyar Əliyev küçəsi,26 ünvanında yerləşən baytarlıq-sanitariya ekspertiza laboratoriyasının krematoriyasında aidiyyəti qurumların əməkdaşlarının iştirakı ilə baytarlıq-sanitariya tələblərinə uyğun olaraq zərərsizləşdirilib. Həmçinin, baytarlıq haqqında qanunvericiliyi pozduğuna görə Bakı şəhər Baytarlıq İdarəsi tərəfindən vətəndaş Fuad Alik oğlu Həsənov İnzibatı Xətalar Məcəlləsinin 289.0.2. maddəsinə uyğun olaraq 200 manat məbləğində cərimə olunub.

    Ekspertizaların nəticələri müvafiq araşdırmalar aparan Binəqədi rayon Polis İdarəsinə göndərilib.

    Xatırladaq ki, mayın 5-də alınmış məlumat əsasında Bakı şəhər Baytarlıq İdarəsinin və Binəqədi rayon Polis İdarəsinin əməkdaşlarının iştirakı ilə qida təhlükəsizliyinin qorunması, insan həyat və sağlamlığına təhlükə törədən, mənşəyi məlum olmayan heyvandarlıq məhsullarının satışının qarşısını almaq məqsədi ilə Bakı şəhəri, Binəqədi rayonu, Rəsulzadə qəsəbəsi, H.Ağamalıyev küçəsi,1 ünvanında yerləşən F.Həsənova məxsus kolbasa məhsullarının satışı anbarına baxış keçirilib. Baxış zamanı 20 kv. metr sahəsi olan, havalandırma və soyuducu sistemi olmayan qarajda temperatur rejiminə əməl edilməyən, qeyri-qanuni, antisanitar şəraitdə, ümumi çəkisi 100 kq olan yararlıq müddəti bitən kolbasa məmulatlarının saxlanıldığı və satıldığı aşkar olunub. İlkin araşdırma zamanı qarajda yararlıq müddəti bitən, kiflənən və insan qidası üçün təhlükəli olan “Doktorskaya”, bişmiş, yarımhisə verilmiş “Krakovskaya” və s. kolbasa və sosiska nümunələrinin olması müəyyən edilib.

    Bakı şəhər Baytarlıq İdarəsinin əməkdaşları qarajda aşkar edilmiş kolbasa və sosiska məhsullarından baytarlıq qanunvericiliyinə müvafiq nümunələr götürərək müayinə üçün Respublika Baytarlıq Laboratoriyasına göndəriblər.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi