UEFA Millətlər Liqasının qrup mərhələsində II tura start verilib.
"Report"un məlumatına görə, turun ilk oyun günündə A,B,C və D Liqalarında ümumilikdə 9 qarşılaşma oynanılıb.
A Liqasının 2-ci qrupunda Portuqaliya İsveçrəni qəbul edib. Görüş meydan sahiblərinin 4:0 hesablı qələbəsi ilə yekunlaşıb. Qollardan 2-ni Kriştianu Ronaldu vurub.
Qrupun digər oyununda İspaniya səfərdə Çexiyaya məğlubiyyətdən hər hissənin sonlarında vurduğu qollarla qurtulub.
B Liqasının 4-cü qrupunda Serbiya evdə Sloveniyanı darmadağın edib, Norveç isə səfərdə İsveç üzərində qələbə qazanıb. Skandinaviyalıların duelində hər iki qolu Erlinq Holann vurub.
C Liqasında 2-ci qrup qarşılaşmasında Kipr evdə Şimali İrlandiya ilə qolsuz heç-heçə edibsə, Yunanıstan səfərdə Kosovoya minimal hesabla qalib gəlib.
4-cü qrupun oyunlarına gəlincə, Şimali Makedoniya səfərdə Cəbəllütariqi 2:0 hesabı ilə yenib. Gürcüstan isə Bolqarıstanı darmadağın edərək, ardıcıl ikinci qələbəsini qazanıb.
Nəhayət, D Liqasında Malta səfərdə San-Marinoya qalib gəlib.
UEFA Millətlər Liqası
II tur
A Liqası
2-ci qrup
22:45. Portuqaliya - İsveçrə - 4:0
Qollar: Vilyam Karvalyu, 15. Kriştianu Ronaldu, 35; 40. Joau Kanselu, 68