Bu ilin yanvar-oktyabr aylarında Gürcüstan Azərbaycandan 250 milyon 289 min ABŞ dolları dəyərində 1,376 milyard kubmetr təbii qaz idxal edib.
“Report”un Gürcüstanın Milli Statistika İdarəsinin məlumatları əsasında apardığı hesablamalara əsasən, bu, 2022-ci ilin eyni dövrünün göstəricisindən dəyər ifadəsində 7 %, kəmiyyət olaraq – 5 % azdır.
Beləliklə, Azərbaycan Gürcüstana təbii qaz ixrac edən ölkələr sırasında 1-ci yerdə qərarlaşıb. Qonşu ölkənin tədarük etdiyi “mavi yanacağ”ın 78,4 %-i Azərbaycanın payına düşüb.
Hesabat dövründə Gürcüstan xarici ölkələrdən 352,3 milyon ABŞ dolları dəyərində 1,755 milyard kubmetr təbii qaz alıb ki, bu da bir il əvvəlki göstəricilərdən müvafiq olaraq 11 % və 8 % çoxdur. O cümlədən, Gürcüstana Rusiyadan 101,62 milyon ABŞ dolları dəyərində 379 milyon kubmetr ton, İrandan 142 min ABŞ dolları dəyərində 73,3 min kubmetr, Koreya Respublikasından 68 min ABŞ dolları dəyərində 16,62 min kubmetr, Honkonqdan (Çininin xüsusi inzibati rayonu) 40,11 min ABŞ dolları dəyərində 21,5 min kubmetr təbii qaz idxal edilib.
Xatırladaq ki, 2022-ci ildə Gürcüstan 457,79 milyon ABŞ dolları dəyərində 2,26 milyard kubmetr təbii qaz alıb ki, bunun da 345,2 milyon ABŞ dolları dəyərində 1,842 milyad kubmetri Azərbaycanın payına düşüb. 2021-ci illə müqayisədə Gürcüstan Azərbaycandan təbii qaz tədarükünə çəkdiyi xərci 38 %, "mavi yanacağ"ın həcmini isə 17,3 % artırıb.