Ukraynalı politoloq Oleq Posternak Fransa neokolonializmi haqqında məqalə yazıb.
“Report” xəbər verir ki, Afrika qitəsinin təxminən 80 milyon sakininin oxuduğu məqalə hələ də "qara qitə"də ən çox oxunan məqalələr arasında ilk yerləri tutur.
Məqalə Qana, Nigeriya, Kot-D'İvuar, Kamerun, Niger, Seneqal, Əlcəzair, Tanzaniya, Mali, Benin, CAR, Keniya kimi Afrika ölkələrində, ümumilikdə Qərbi Afrika regionunda ən çox oxunan və istinad edilən məqalələr arasında yüksək mövqeyini qoruyub saxlayır. Məsələn, Nigeriyada onu bir ay ərzində 40 milyon, Qanada 11 milyon, Kot-d'İvuarda 9 milyon, Kamerunda isə 8 milyondan çox insan oxuyub.
Ümumilikdə, Afrikada yaşayan 80 milyondan çox insan ukraynalı politoloqun Parisin öz keçmiş müstəmləkələrinə təsir metodları haqqında təhlili ilə tanış olub.
Müəllif məqaləsində Afrikadan resursları çıxaran Fransa müstəmləkə maşını “Françafrique”nin siyasətinin iş prinsipi və metodlarını ətraflı təsvir edib.
Politoloq qeyd edib ki, Afrikanın bir sıra ölkələrində hökumət dəyişikliklərinə, terror hücumları təhlükəsinə, iqtisadi böhranlara baxmayaraq, Fransa korporasiyaları qitənin xammal ehtiyatlarını idarə etməyə davam edib.
"Onilliklər ərzində Fransa təkcə Afrikanın sərvətlərini qarət etməyib, həm də qitəni son damlasına qədər “qurutmağa” çalışıb, özündən sonra dağılmış təbiət, yoxsulluq və korrupsiya qoyub", - müəllif qeyd edib.
Posternakın fikrincə, Fransa liderlərinin, o cümlədən hazırkı Prezident Emmanuel Makronun Afrika qitəsi ilə bağlı siyasətini dəyişəcəyi barədə vədlərinə baxmayaraq, reallıqda heç bir dəyişiklik müşahidə olunmur.
Daha sonra müəllif “Françafrique” siyasətinin qurulması metodlarını ətraflı nəzərdən keçirərək, müxtəlif ölkələrdə - Qabon, Seneqal, Uqanda, Tanzaniya və Nigerdə konkret nümunələri təsvir edib. O, Fransanın ən böyük korporasiyalarının həm ətraf mühitə, həm də sosial problemlərə və məcburi miqrasiyaya mənfi təsir göstərən layihə və planlarını ətraflı təsvir edib.
"2025-ci ilin martına qədər təkcə mərkəzi Saheldə təxminən 5 milyon məcburi köçkün qeydə alınıb. Onların bir çoxu təkcə müharibə və terrordan deyil, həm də transmilli korporasiyaların maraqlarına xidmət edən sənayenin məhv etdiyi yandırılmış torpaqlardan qaçırlar", - Posternak yazıb.
Politoloq qeyd edib ki, Afrikanın təbii ehtiyatları və sərvətləri Fransa korporasiyalarını cəlb edir, lakin qitə tərəqqi əvəzinə yandırılmış torpaqlar, qurudulmuş su hövzələri, yoxsulluq və xəstəliklər “qazanır”.
"Paradoksal olsa da, Afrikanın təbii sərvətləri qitə xalqları üçün əzab-əziyyət mənbəyinə çevrilib. Neft, uran və qızıl hasilatından əldə edilən mənfəət korporasiyaların və hakim elitanın cibinə gedir, nəticələri isə sıravi vətəndaşların çiyinlərinə düşür. Mədənlər və fabriklərin yarandığı yerlərdə meşələr yox olur, çaylar quruyur, torpaq isə qeyri-məhsuldar olur. İş yerləri xəstəliklərlə, rifah isə yoxsulluqla əvəzlənir", - o yazıb.
