Qubada tarixi hamamın bərpa edildikdən sonra açılışı olub

Tədbirdə Azərbaycanın mədəniyyət və turizm naziri, ABŞ-ın Azərbaycandakı səfiri iştirak ediblər

Tədbirdə Azərbaycanın mədəniyyət və turizm naziri, ABŞ-ın Azərbaycandakı səfiri iştirak ediblər

Quba. 26 mart. REPORT.AZ/ "Azərbaycan torpağı həmişə multikulturalizm ənənələri ilə məşhur olub".

"Report" xəbər verir ki, bunu Azərbaycanın mədəniyyət və turizm naziri Əbülfəs Qarayev Qubada 18-19-cu əsrlərə aid tarixi hamamın Mədəni İrsin Qorunması üzrə ABŞ səfirləri Fondu tərəfindən maliyyələşdirilmiş bərpa prosesindən sonra açılışında deyib.

O bildirib ki, Quba 20-dən çox millətin sülh və əmin-amanlıq şəraitində bir yerdə yaşamasına dair çox gözəl nümunədir. Nazirin sözlərinə görə, Azərbaycan-ABŞ münasibətləri müxtəlif sahələrdə, o cümlədən mədəniyyət sahəsində inkişaf edir.

Eyni zamanda, nazir Azərbaycanın tarixi abidələrinin Azərbaycanın işğal olunmuş ərazilərində ermənilər tərəfindən məhv edildiyini və özününküləşdirildiyini vurğulayıb: "Azərbaycan torpaqlarının Ermənistan tərəfindən işğalı nəticəsində oradakı mədəni və tarixi irsimizi qoruya bilmərik, vandallar isə onlar haqqında faktları saxtalaşdırırlar".

Tədbirdə ABŞ-ın Azərbaycandakı səfiri Robert Sekuta da iştirak edib.

Qeyd edək ki, XVIII-XIX əsrlərə aid abidə el arasında "Çuxur hamam", "Gümbəzli hamam", "Bəkir hamamı", "Məşədi Əlimərdan hamamı" adları ilə tanınır. Hamam 1985-ci ilə kimi təyinatına uyğun istifadə olunub. Şərq memarlıq üslubunda tikilmiş hamam Mədəniyyət və Turizm Nazirliyi tərəfindən tarixi abidə kimi qorunur.