Riqada Şərq Tərəfdaşlığı ölkələrinin I Media Konfransı açılıb

Riqa 20 may. REPORT.AZ/ Latviyanın paytaxtı Riqada Şərq Tərəfdaşlığı ölkələrinin I Media Konfransı açılıb. "Report" xəbər verir ki, IV Şərq Tərəfdaşlığı Sammiti ərəfəsində Latviyanın Aİ-də sədrliyi çərçivəsində təşkil olunan konfransın əsas mövzusu KİV-in Şərq Tərəfdaşlığı regionundakı roludur. 

Konfransda proqram ölkələrinin 350 yaxın KİV nümayəndəsi, ekspertlər, həmçinin vətəndaş cəmiyyətinin nümayəndələri iştirak edir. 

Konfransı Latviya Seyminin spikeri İnara Murnietse açıb. O qeyd edib ki, I Media Konfransının keçirilməsi Latviyanın Aİ-dəki sədrliyi çərçivəsindəki təşəbbüsüdür və Rusiyanın Ukraynanın şərqində yaratdığı təhlükəli vəziyyəti nəzərə alaraq, bu gün çox aktualdır.  

"Mətbuat azadlığı, söz azadlığı demokratiya və azad cəmiyyətin təməl daşıdır", - İ.Murnietse vurğulayıb. 
Latviya Seyminin spikeri  KİV-in obyektiv informasiyanın çatdılrılmasında əhəmiyyətini və dezinformasiya təzyiqinə müqavimət göstərməyin zəruriliyini qeyd edib.
"Buna görə bizim görüşümüz vacibdir. Bu, sammitə və onun yekun bəyannaməsinə dəyərli töhfə verəcək ", -  İ.Murnietse  bəyan edib. 

Konfransın xüsusi qonaqları arasında Aİ-nin Avropa Qonşuluq Siyasəti məsələləri üzrə komissarı Yohannes Han, Latviyanın sabiq prezidenti Vike-Freyberq, Avropa Şurası insan hüquqları üzrə komissarı Nils Muyjniyeks, ATƏT-in KİV azadlığı məsələləri üzrə nümayəndəsi Dunya Miyatoviç və başqaları var. 
Qeyd edək ki, bu gün Riqada həmçinin Şərq Tərəfdaşlığı ölkələrinin vətəndaş cəmiyyətləri nümayəndələrinin konfransı da keçirilir.