BMT Azərbaycanda Dayanıqlı İnkişaf üzrə Milli Əlaqələndirmə Şurasının yaradılmasını alqışlayır

Bakı. 10 oktyabr. REPORT.AZ/ BMT Azərbaycan Prezidentinin "Dayanıqlı İnkişaf üzrə Milli Əlaqələndirmə Şurasının yaradılması haqqında" fərmanını müsbət qarşılayır.

"Report"un məlumatına görə, bu barədə BMT Rezident Əlaqələndiricisinin Azərbaycan Ofisinin yaydığı bəyanatda bildirilir. 

"Biz hökumətin qlobal məqsədlərin səmərəli həyata keçirilməsi yolunda göstərdiyi öhdəlik kimi Dayanıqlı İnkişaf üzrə Milli Əlaqələndirmə Şurasının yaradılmasından məmnunuq. Azərbaycandakı BMT Sistemi Dayanıqlı İnkişaf Məqsədlərinə nail olmaq istiqamətində Şuranı dəstəkləməyə hazırdır və vətəndaş cəmiyyəti, eləcə də Azərbaycan cəmiyyətindəki digər seqmentləri bir araya gətirəcək inklüziv prosesin baş tutacağına ümid edir", - deyə sənəddə qeyd olunub.

Bəyanatda vurğulanıb ki, Azərbaycan BMT-nin digər 193 üzvü kimi, 2015-ci ilin sentyabrında BMT Sammitində 2030 Gündəliyini imzalayıb: "Bununla da ölkə kollektiv təşəbbüsə qoşularaq heç bir kəsin bu prosesdən kənarda qalmamasına söz verməklə dünyanı dayanıqlı və güclü edəcək təxirəsalınmaz, cəsarətli və transformativ tədbirlərin həyata keçirilməsi öhdəliyini öz üzərinə götürüb".