Bakı. 16 sentyabr. REPORT.AZ/ Azərbaycanın iqtisadiyyat və sənaye naziri Şahin Mustafayev iki ölkə arasında ikitərəfli münasibətlərin genişləndirilməsi və dərinləşdirilməsi yollarını müzakirə etmək üçün Tehrana gedib. Report-un Farsnews İran agentliyinə istinadən verdiyi xəbərə görə, Ş.Mustafayevin üçgünlük səfəri ötən ay Bakıda keçirilən iqtisadi əməkdaşlıq üzrə müştərək Azərbaycan-İran komissiyasının doqquzuncu iclasında əldə edilən razılaşmaların təmin olunması məqsədini daşıyır.
Ş.Müstafayevin rəhbərlik etdiyi nümayəndə heyətinin tərkibinə Azərbaycanın bir sıra nazirlikləri və idarələrin nümayəndələri, o cümlədən Xarici İşlər, Energetika, İqtisadiyyat və Sənaye, Nəqliyyat Nazirliklərinin rəsmiləri, eləcə də Azərbaycanın bir sıra şirkətlərinin, o cümlədən neft-qaz sektorunda fəaliyyət göstərən şirkətlərin nümayəndələri daxildir.
Səfər İranın rabitə və informasiya texnologiyaları naziri, iqtisadi əməkdaşlıq üzrə Azərbaycan-İran komissiyasının həmsədri Mahmud Vayezinin dəvəti ilə baş tutub.